По повод 36-годишнината од основањето на ВМРО-ДПМНЕ, која денес се одбележува во Струмица под мотото „Македонија забрзува, наша обврска“, генералниот секретар на партијата Драган Ковачки порача дека ВМРО-ДПМНЕ претставува мост меѓу историското ВМРО и современата македонска држава.
Во изјава за Сител телевизија, Ковачки истакна дека евроинтеграциите остануваат стратешка цел на Македонија, но притоа мора да се зачува достоинството и да се брани македонската вистина.
„Ние Македонците имаме историска вертикала. Не сме дрво без корен. ВМРО-ДПМНЕ уште во своите основачки документи е евроатлантски определена партија. Ние сме цврсто определени за европскиот пат, но истовремено ги презентираме нашите ставови и ја браниме македонската вистина“, изјави Ковачки.
Тој нагласи дека во изминатиот период е засилена дипломатската активност кон европските партнери и изрази очекување дека ќе се дојде до рационално решение во односите со Бугарија, кое ќе овозможи Македонија да продолжи напред на патот кон Европската Унија.
Ковачки се осврна и на економските резултати, посочувајќи дека државата бележи седум последователни квартали економски раст од над 3 проценти, како и значителни инвестиции во патната инфраструктура, здравството и капиталните проекти.
„Мора да се работи уште повеќе, но почнавме од многу тешка состојба. Токму затоа мотото на нашиот 36-ти роденден е ‘Македонија забрзува’. Резултатите веќе се видливи, а граѓаните ќе ги чувствуваат сѐ повеќе во периодот што следува“, порача Ковачки од Струмица.
