Денес, на 97-годишнината од раѓањето на Драган Богдановски, членови на Извршниот комитет на Унија на Ветерани на ВМРО-ДПМНЕ, членови на неговото семејство и почитувачи на неговиот лик и дело положија свежо цвеќе на неговото вечно почивалиште во Куманово.
Со овој чин беше оддадена почит на еден од најзначајните дејци на македонската политичка емиграција, човек кој речиси целиот свој живот го посвети на идејата за самостојна, суверена и независна Македонија.
Драган Богдановски е роден на 18 септември 1929 година во Клечовце, Кумановско. Децении дејствуваше меѓу македонската емиграција во Европа, беше претседател на Движењето за ослободување и обединување на Македонија – ДООМ и разви богата публицистичка и издавачка дејност.
Поради својата политичка активност, во 1977 година беше киднапиран во Париз од југословенската тајна служба, пренесен во Југославија и осуден на долгогодишна затворска казна.
По излегувањето од затвор, Богдановски повторно се вклучи во политичкото организирање на Македонците и одигра значајна улога во создавањето на ВМРО-ДПМНЕ. На Првиот конгрес на партијата во 1991 година беше избран за нејзин почесен претседател.
Драган Богдановски почина на 31 мај 1998 година. Неговиот живот и дело остануваат дел од историјата на македонската борба за национална самостојност и независна држава.
Денес, на денот на неговото раѓање, споменот за Драган Богдановски повторно нè потсетува на човекот кој со децении живееше со една идеја и еден завет – Македонија да биде слободна и независна држава.
