Кога во јавноста се појавуваат информации дека службени лица со пари од државата и од државните компании купуваат предмети за лична употреба, како брендирани чанти „Хермес“, „Луј Витон“ и „Диор“, сметаме дека јавноста треба да ги знае сите детали.
Управата за финансиска полиција поднесе кривична пријава до Основното јавно обвинителство Скопје против две службени лица вработени во АД Државна лотарија, поради сомнение за сторени кривични дела „Проневера во службата“ и „Фалсификување или уништување деловни книги“, предвидени во Кривичниот законик.
Постојат сомнежи дека овие лица, наместо дневниот промет од продажните места да го депонираат на банкарските трансакциски сметки на друштвото, го присвојувале за себе.
Јавноста треба да знае дека осомничените се во Државна лотарија од времето на Димитар Ковачевски – Таче, кога Артан Груби беше вицепремиер, а Перпарим Бајрами беше генерален директор на компанијата. Бајрами сега е првообвинет во судскиот случај поврзан со финансиски злоупотреби и проневера во Државна лотарија.
Со оглед на тоа што во тек е судењето за Груби и Бајрами, сакаме да ја информираме јавноста од кога се вработени лицата што сега се осомничени за кривични дела во државната компанија.
