На 23 септември во 18.30 часот, во Меморијалниот центар на Холокаустот на Евреите од Македонија во Скопје, ќе се одржи културно-меморијалната манифестација „Патување кон корените“, посветена на трагичните судбини на децата прогонети од Егејскиот дел на Македонија.
Во рамките на манифестацијата ќе бидат прикажани документарниот филм „Македонецот“ и изложбата „Мајко мила“ на Петро Алексовски – Македонец кој живее и твори во Полска. Преку фотографии, уметнички дела, сведоштва и вистински човечки судбини, настанот ќе нè потсети на едно од најболните поглавја од поновата македонска историја.
Пред повеќе од седум децении, во виорот на војната и човечкото страдање, илјадници македонски деца биле насилно одделени од своите родители, домови и од сопственото детство. Заминале не знаејќи каде ги водат, дали повторно ќе ги видат своите мајки и татковци и дали некогаш повторно ќе зачекорат по патеките на родното место.
Нивни нови домови станале далечни и непознати земји – Полска, Чехословачка, Унгарија, Романија и други држави. Таму пораснале, создале семејства и изградиле нов живот. Но никогаш не ги заборавиле своите македонски корени – мирисот на родната земја, песните од детството, мајчиниот глас, името на своето село и детскиот џагор што засекогаш останал по ливадите и селските дворови.
Многумина цел живот го носеле во срцето прашањето: Ќе се вратиме ли некогаш дома?
„Патување кон корените“ не е само изложба и проекција на документарен филм. Тоа е патување низ нашата заедничка меморија – приказна за разделбата и страдањето, но и за надежта, истрајноста, љубовта кон татковината и духовното враќање кон корените.
Манифестацијата ги оживува нивните спомени не за да останеме заробени во минатото, туку за да ја сочуваме вистината и да им ја пренесеме на идните поколенија. Зашто народ што ги помни своите деца, своите рани и своите корени никогаш не може да биде избришан од историјата.
Ги покануваме сите граѓани, потомци на прогонетите деца, СОЈУЗ НА ЗДРУЖЕНИЈАТА НА МАКЕДОНЦИТЕ И ДЕЦАТА БЕГАЛЦИ ОД ЕГЕЈСКИОТ ДЕЛ НА МАКЕДОНИЈА – МАКЕДОН, Светскиот Македонски Конгрес, историчари, истражувачи, културни работници, ученици, студенти и сите што ја почитуваат историската вистина да бидат дел од ова достоинствено сеќавање.
Дојдете заедно да им оддадеме почит на децата што прерано биле одделени од мајчината прегратка и родниот дом. Да ги слушнеме нивните приказни, да ја почувствуваме нивната болка и да покажеме дека нивното страдање не е заборавено.
23 септември во 18.30 часот – Меморијален центар на Холокаустот на Евреите од Македонија, Скопје
Дојдете да патуваме заедно кон корените – во чест на децата што биле принудени-прогонети да заминат, но никогаш не престанале да ја носат Македонија во своите срца.
Предвидено е манифестацијата „Патување кон корените“ да биде претставена на 24 септември во Охрид и во други градови низ Република Македонија.
