Со потпишувањето на договорот за инвестициски грант од Европската Унија и договорите за финансирање со Европската инвестициска банка и Европската банка за обнова и развој, почнува третата фаза од финансирањето на железничката делница Крива Паланка – Деве Баир, која е дел од Коридорот 8.
На потпишувањето во Владата присуствуваа премиерот Христијан Мицкоски, вицепремиерот и министер за транспорт Александар Николоски, министерката за финансии Гордана Димитриеска-Кочоска, заменик-шефот на Делегацијата на Европската Унија Бен Нупнау, директорот на ЕБОР за Македонија Фатих Туркменоглу, директорот на ЕИБ во Македонија Бјорн Габриел и директорот на Железници – Инфраструктура, Синиша Ивановски.
Преку Инвестициската рамка за Западен Балкан на Европската Унија се обезбедени 149 милиони евра неповратни средства за изградба на третата делница од железничкиот Коридор 8.
Работите на терен се очекува да почнат во текот на годинава. Изборот на изведувач е предвиден за есен, по што треба веднаш да започне изградбата. Во тек е и тендерот за избор на надзор, кој се спроведува во две фази, додека тендерот за градба ќе се спроведе во една фаза.
Министерот за транспорт Александар Николоски истакна дека денешното потпишување претставува продолжување на визијата Македонија да ја искористи својата единствена положба како крстосница на Коридорите 8 и 10 и да го потврди своето место како срце на Балканот.
„Изградбата на Коридорот 8 е еден од врвните приоритети на Владата. Ова е исклучително значаен ден бидејќи, по речиси две години работа, доаѓаме до реален и остварлив проект“, нагласи Николоски.
Тој посочи дека е постигнат договор со Бугарија за изградба на прекуграничниот железнички тунел што треба да ги поврзе двете држави. На крајот од август се очекува во Скопје да се одржи вториот меѓувладин состанок, по што двете земји треба да испратат заедничко писмо до ЕУ, ЕИБ и ЕБОР за обезбедување грант за изградбата на тунелот.
„Овој настан покажува како може да се реализираат проекти, да се решаваат проблемите од минатото и работите да се постават на вистинските шини“, рече Николоски.
Министерката за финансии Гордана Димитриеска-Кочоска оцени дека со потпишаните документи се создаваат услови за непречено продолжување на еден од најзначајните инфраструктурни проекти во Македонија.
Станува збор за амандмани на договорите за финансирање и на договорот за грант за изградба на новата железничка делница од Крива Паланка до границата со Бугарија. Со нив се обезбедува финансиска конструкција за целосна реализација на проектот.
Според Димитриеска-Кочоска, новата железница ќе овозможи подобро поврзување на Јадранското и Црното Море, поголема економска интеграција, полесно движење на луѓето и стоките и нови можности за развој на македонската економија и на целиот регион.
Таа нагласи дека за реализацијата на стратешките проекти, покрај политичката определба, неопходна е стабилна и одржлива финансиска рамка.
„Во изминатите две години интензивно работиме на забрзување на проектите што ги наследивме во застој, како и на започнување нови инвестиции што придонесуваат за подобри услови за живот, унапредување на економијата и напредок на евроинтегративниот процес“, рече министерката.
Со ребалансот на Буџетот за 2026 година се обезбедени дополнителни 5,8 милијарди денари за капитални расходи, што е зголемување од 14,3 проценти во однос на првично планираните средства.
Димитриеска-Кочоска истакна дека инвестициите во инфраструктурата придонесуваат за поголема конкурентност на македонската економија, подобра регионална поврзаност, нови можности за деловниот сектор и повисок животен стандард.
„Одговорното управување со јавните финансии, обезбедувањето средства за капитални инвестиции и силното партнерство со меѓународните финансиски институции создаваат основа за одржлив економски раст и побрза интеграција на Македонија во европските транспортни и економски текови“, нагласи министерката.
