Македонска Нација
СДС и Венко Филипче сѐ повеќе се разоткриваат во своите политики на сервилност и отстапки, а случајот со оставката на Рубин Земон, според ВМРО-ДПМНЕ, е уште еден доказ за кризата и конфузијата во опозициската партија.
Од ВМРО-ДПМНЕ посочуваат дека скандалот со изјавите на Земон, како и реакциите во јавноста, покажале дека дури и во СДС сфатиле дека е направена сериозна политичка штета, поради што тој бил принуден да се повлече за да не го наруши дополнително угледот на партијата.
Во партиското соопштение се наведува дека политиките на Венко Филипче довеле до сериозен пад на довербата кај граѓаните, додавајќи дека неговиот рејтинг е на историски минимум, а СДС се соочува со внатрешни поделби и осипување на членството.
Од ВМРО-ДПМНЕ прашуваат дали Филипче се оградува од ставовите на Рубин Земон, кој, како што велат, изнесувал навредливи тези за македонскиот револуционер Гоце Делчев и неговото значење за македонскиот идентитет.
Во реакцијата се потсетува и на фотографијата на Земон со, како што се наведува, истакнати антимакедонски активисти во Софија, за која Земон тврдеше дека била случајна средба.
Според ВМРО-ДПМНЕ, Филипче е опкружен со луѓе на кои не им пречат навредите кон Македонија и македонскиот национален идентитет, а со своите политики, како што велат, им остава простор на бугарските власти за нови притисоци и уцени кон државата.
„Како што тргнал Филипче, на крај ќе остане сам со кланот Заеви“, се наведува во соопштението.
