Во интервју за ТВ Алфа, поранешниот прв антикорупционер Зафировски оцени дека изјавата на Ива Михаилова отворила прашања за улогата на бугарската Државна агенција за национална безбедност (ДАНС) во случајот.
Според Зафировски, бугарските служби се обиделе преку случајот со Михаилова да изградат приказна во која Република Македонија би била обвинета за нечовечки третман на лица за кои се тврди дека имаат бугарско потекло. Тој смета дека зад таквиот обид стоеле политички интереси во Бугарија.
Зафировски се повика на изјавата на Михаилова, која, според неговото пренесување, кажала дека од неа било побарано прво да разговара со конкретен новинар и да ја пренесе верзијата на настаните што службите ќе ѝ ја подготват. Како што наведе тој, од неа било побарано да не комуницира со други новинари, а тоа, според неговите тврдења, било поставено како услов за лекување и за исполнување на ветувањата што ги добила.
Тој додаде дека по појавувањето на изјавата во бугарската јавност, за случајот почнале да известуваат и бугарски медиуми, а дел од тамошните политички партии побарале одговорност за постапувањето на ДАНС.
Во интервјуто Зафировски се осврна и на поранешниот премиер Зоран Заев, за кого оцени дека со своите потези ѝ дал простор на бугарската страна да поставува дополнителни барања кон Македонија.
Во случајот со Михаилова, според него, постапувањето на ДАНС се претворило во „автогол“, бидејќи прашањето за одговорноста било отворено во самата Бугарија.