Почит за осумтемина македонски херои
Во организација на групата Бранители и Синдикатот на полицијата на Македонија при СВР Куманово, на 9 Мај беше одбележана годишнината од трагичните настани во Диво Насеље од 9 и 10 Мај 2015 година, во чест и сеќавање на осумтемина македонски херои кои ги загубија животите бранејќи ја државата и безбедноста на граѓаните.
Одбележувањето започна со панихида во Соборниот храм „Свети Никола“ во Куманово, каде семејствата, колегите, пријателите и граѓаните им оддадоа почит на загинатите припадници на безбедносните сили. Во молитвена атмосфера беа запалени свеќи и беа упатени пораки за вечен спомен и благодарност кон хероите.
Потоа беше положено свежо цвеќе пред спомен-обележјето во кругот на СВР Куманово, каде присутните со минута молк им оддадоа почит на загинатите бранители. Присутните истакнаа дека жртвата на македонските полицајци никогаш не смее да биде заборавена и дека нивната храброст останува симбол на пожртвуваност и патриотизам.
Во рамки на одбележувањето беше организиран и Меморијален турнир во мал фудбал во Средното економско училиште „Перо Наков“, на кој учествуваа повеќе екипи составени од припадници на безбедносните структури, ветерани, пријатели и поддржувачи на бранителите. Турнирот беше посветен на споменот на загинатите херои и испрати порака за единство, почит и незаборав.
Настаните во Диво Насеље од 9 и 10 Мај 2015 година остануваат едни од најтешките безбедносни предизвици во поновата македонска историја, во кои животот го загубија осум припадници на македонските безбедносни сили, додека десетици беа повредени.
„Хероите умираат кога ќе ги заборават!“
Слава им!
