Премиерот и претседател на ВМРО-ДПМНЕ, Христијан Мицкоски, денеска изјави дека партијата е подготвена за парламентарни избори кога и да ги побара опозицијата, нагласувајќи дека во втората половина од мандатот секоја сериозна политичка структура мора да биде подготвена за сите можни сценарија.
Одговарајќи на новинарско прашање при пуштањето во употреба на спортската сала „Расадник“ во скопската општина Кисела Вода, Мицкоски рече дека изборите секако ќе дојдат многу скоро, но не прецизираше дали мисли на евентуални предвремени парламентарни избори во 2027 година или на редовните избори во 2028 година.
„Политички умно е кога ќе влезете во втората половина на мандатот да бидете подготвени за било какви сценарија. Ние сме кажале дека наша опција која ја преферираме како Влада е редовни избори во 2028, но сме подготвени ако опозицијата побара да излеземе на терен и да победиме“, изјави Мицкоски.
Премиерот повтори дека приоритет на Владата останува реализацијата на програмските определби и проектите што беа ветени пред граѓаните, но истовремено порача дека владејачкото мнозинство нема страв од проверка на довербата кај народот.
Со денешната порака Мицкоски испрати сигнал дека ВМРО-ДПМНЕ е подготвена за изборен натпревар во секој момент, доколку за тоа постои политичка иницијатива од опозициските партии.
