Македонска Нација
Обидот на СДС преку прес-конференцијата на Јон Фрчкоски да прикаже наводен скандал околу јавните набавки отвори повеќе прашања за периодот кога токму нивната партија беше на власт. Наместо ново откритие, јавноста слушна список на компании кои со години учествуваат на јавни набавки и добивале договори од институции управувани од функционери на СДС.
Јон Фрчкоски, син на еден од најпознатите идеолози на СДС, денеска излезе да брои колку тендери добиле одредени фирми. Но, ако веќе се анализираат јавните набавки, тогаш логично е да се погледне и периодот кога СДС ја предводеше Владата, а нивни министри, директори и градоначалници доделувале тендери на истите тие компании.
Податоците за јавните набавки не се тајна. Тие се јавно достапни преку електронскиот систем за јавни набавки и секој заинтересиран граѓанин може да ги провери.
Станува збор за компании кои со години работат на пазарот, редовно се пријавуваат на јавни повици и добиваат договори согласно условите и најповолните понуди.
Особено е интересен фактот што фирмите што денес СДС ги посочува како пример за наводна спорност, добивале тендери и во времето кога токму СДС беше на власт.
Според достапните податоци, БМБ Архитекти во 2023 година добивала договори од Министерството за образование, Министерството за здравство, Министерството за труд и социјална политика, Собранието на Република Македонија, АД МЕПСО, Државна видеолотарија, Општина Центар, како и од повеќе универзитетски клиники и факултети.
Кај МГ Проект, пак, бројот на добиени јавни набавки во периодот на владеење на СДС е уште поголем. Компанијата добивала тендери од општини управувани од градоначалници на СДС, меѓу кои Центар, Струмица, Делчево, Валандово, Богданци, Крива Паланка и Крушево, како и од Министерството за животна средина и просторно планирање, Министерството за култура, Министерството за образование и наука, Министерството за транспорт и врски, Министерството за земјоделство, шумарство и водостопанство и други државни институции.
Оттука, наместо обиди за создавање политички конструкции, од СДС би требало најнапред да дадат одговор како истите тие компании добивале јавни набавки и во периодот кога нивни функционери раководеле со институциите.
Во реакцијата се посочува и дека раководството на СДС треба да даде одговор на прашањата што со години се поставуваат во јавноста, наместо да создава привид на скандали околу процедури и компании кои работеле со државни институции и за време на нивното владеење.
