Додека Владата работи на отворање перспективи за младите и создавање нови економски можности, лидерот на СДС, Венко Филипче, продолжува да ја гради својата политичка стратегија врз концепт што граѓаните веќе еднаш го отфрлија на избори.
Додека економските показатели бележат раст, невработеноста се намалува, а илјадници млади добиваат нови можности преку активните мерки за вработување, лидерот на СДС повторно испраќа пораки за нови национални отстапки во обид да се врати на власт.
Владата предводена од ВМРО-ДПМНЕ продолжува да спроведува политики насочени кон економски раст, отворање нови работни места и подобрување на животниот стандард на граѓаните. Наместо празни ветувања и политички експерименти, резултатите сè повеќе се гледаат и во официјалните статистички податоци.
Според последните податоци на Државниот завод за статистика, стапката на невработеност е намалена од 12,5 на 11,3 проценти, додека стапката на вработеност е зголемена од 45,6 на 46,5 проценти. Во првиот квартал од 2026 година во Македонија се регистрирани 707.385 вработени лица, што е значително повеќе во споредба со 691.736 вработени лица во средината на 2024 година.
Овие бројки не се случајни. Тие се резултат на политики што го поддржуваат домашното стопанство, привлекуваат нови инвестиции и создаваат услови за отворање одржливи и подобро платени работни места.
Посебно внимание Владата посветува на младите. Преку Оперативниот план за вработување за 2026 година, вреден речиси 40 милиони евра, ќе бидат опфатени повеќе од 10.000 лица, а над 32 милиони евра директно ќе се вложат во отворање нови работни места и активни мерки за вработување.
Мерката за самовработување и претприемништво се очекува да создаде повеќе од 2.000 нови работни места. Нејзината успешност веќе беше потврдена во 2025 година, кога преку истата програма беа основани над 2.200 нови компании.
Во центарот на овие политики се младите луѓе. Речиси 6.000 лица до 29-годишна возраст ќе бидат вклучени во програми за вработување, практикантство, обуки, преквалификации и професионален развој. Дополнително, 3.500 млади лица до 23 години кои работат во производствени капацитети ќе добиваат младински додаток од 3.000 денари месечно.
Додека Владата работи на отворање перспективи за младите и создавање нови економски можности, лидерот на СДС, Венко Филипче, продолжува да ја гради својата политичка стратегија врз концепт што граѓаните веќе еднаш го отфрлија на избори.
Во изминатиот период Филипче повеќепати испрати сигнали дека е подготвен за нови отстапки во однос на националните прашања. Неговите ставови за уставните измени и односот кон бугарските барања сè почесто отвораат дилеми дали за него постојат јасни национални црвени линии.
Особено симптоматично е што, и покрај континуираните официјални ставови од Софија со кои се оспоруваат македонскиот јазик, идентитет и историската посебност на македонскиот народ, Филипче продолжува да уверува дека нема опасност за националните позиции на Македонија.
Граѓаните добро паметат дека СДС дојде на власт со ветувања за европско здравство, повисок животен стандард и економски напредок. Наместо тоа, Македонија доби години исполнети со политички кризи, економска стагнација, скандали и сериозни отстапки во однос на националните прашања.
Токму затоа СДС неколкупати по ред доживеа тежок изборен пораз. Граѓаните испратија јасна порака дека не сакаат политика во која националните интереси се предмет на преговарање, а државните позиции се користат како средство за доаѓање или останување на власт.
Разликата денес е очигледна. Од една страна стојат конкретни мерки, нови инвестиции, раст на вработеноста и поддршка за младите. Од друга страна е политика која повторно нуди отстапки и надеж дека некој надвор од Македонија ќе помогне за враќање на власт.
На крајот, премиер не избираат странски политички центри, туку македонските граѓани. А тие сè повеќе ја препознаваат разликата меѓу политики што создаваат работни места и политики што создаваат нови национални дилеми.
