СДС, Левица и ДУИ намерно го опструираат носењето на Изборниот законик поради лошите рејтинзи и стравот од убедлив пораз на следните избори.
Иако со месеци се создаваше консензус меѓу политичките партии за носење на овој важен реформски закон, опозициските партии наместо договор и одговорност, избраа блокади, хаос и политичка какафонија во јавноста.
Левица, откако виде дека нејзиниот рејтинг не оди во посакуваната насока, се обидува да се претстави како „тврдокорна“ пред своето членство преку непотпишување на договорот за Изборниот законик. Вистинската цел е јасна — создавање алиби за лошиот изборен резултат што ги очекува, а вината однапред да се префрли врз ВМРО-ДПМНЕ.
СДС, пак, откако виде дека Левица го блокира процесот, одлучи да не остане покусо и поднесе 10 илјади амандмани. Како изговор го користат електронското гласање на дијаспората, нарекувајќи го недемократско и неевропско. Но вистината е сосема поинаква — СДС се плаши од гласот на дијаспората и од убедливиот пораз што им следува.
ДУИ, од своја страна, се приклучува кон блокадата со барање сите одлуки во Државната изборна комисија да се носат со консензус, наместо според досегашниот демократски мнозински модел. И кај ДУИ причината е иста — страв од волјата на граѓаните и паника од изборен пораз.
ВМРО-ДПМНЕ јасно и гласно порача: сè што ќе побараат и договорат опозициските партии ќе биде прифатено, доколку со тоа се овозможи и олесни гласањето на македонската дијаспора.
Но СДС, Левица и ДУИ покажуваат дека ниту дијаспората, ниту правото на глас на македонските граѓани надвор од татковината, ниту нивното поврзување со Македонија не им се вистински интерес.
Нив ги интересираат само теснопартиските калкулации, блокадите и обидите однапред да најдат оправдување за поразот што ги очекува.
Македонската дијаспора заслужува право на глас. Македонија заслужува функционален Изборен законик. Граѓаните заслужуваат одговорни политичари, а не партии кои од страв од избори ја блокираат државата.