Премиерот Христијан Мицкоски категорично ги отфрли тврдењата дека Ива Михаилова и нејзиниот адвокат заминале во Бугарија преку официјален граничен премин. Тој порача дека македонските власти бараат враќање на Михаилова и нејзиниот татко и ги критикуваше бугарското политичко раководство и македонската опозиција за нивното однесување во случајот.
Премиерот на Република Македонија, Христијан Мицкоски, ги потврди наводите на министерот за внатрешни работи Панче Тошковски дека Ива Михаилова нелегално заминала, односно била пренесена во Бугарија. Според него, информациите пласирани во бугарските медиуми за регуларно преминување на границата се невистинити.
„Апсолутно е невистина тоа што го емитуваа бугарските медиуми, односно го пласираа во јавноста, дека заедно со нејзиниот адвокат поминале на регуларен граничен премин и дека таму биле поздравени, дека им се салутирало и така натаму. Тоа претставува лага“, изјави Мицкоски.
Според премиерот, последниот евидентиран влез на адвокатот на Михаилова во Македонија бил на 28 септември, а тој податок бил потврден и од бугарската страна.
Критики до бугарското политичко раководство
Мицкоски упати остри критики до властите во Бугарија, оценувајќи дека со постапувањето во овој случај се обидуваат да демонстрираат политичка сила, притоа нанесувајќи си штета на меѓународен план.
„Жалам што политичкото водство во Бугарија се обидува на овој начин да покаже политички мускули, а не ја сфаќа штетата што самото си ја прави на меѓународен план. Тоа е нивна одлука. Тие избрале ваква политика“, рече премиерот.
Тој изрази жалење и за начинот на кој Михаилова се претставува во Бугарија, посочувајќи дека најголемиот дел од животот и образованието ги поминала во Македонија.
„Уште денеска нека ги донесат“
Премиерот ги отфрли тврдењата за наводен договор и ја повика бугарската страна да ги врати Михаилова и нејзиниот татко.
„Ако е тоа така договорено, ние ги бараме назад и неа и нејзиниот родител. Уште денеска нека ги донесат и да видиме дали е така договорено или не“, изјави Мицкоски.
Тој повеќепати повтори дека двајцата ќе мора да се соочат со македонските власти.
„Ве гледам во очи и ви кажувам: кога-тогаш. И татко ѝ и таа ќе одговараат. Кога-тогаш“, порача премиерот.
На новинарско прашање за можноста Бугарија да ја екстрадира Михаилова, Мицкоски повтори дека македонските власти остануваат на барањето за нејзино враќање.
Мицкоски ја обвини опозицијата за политизирање на случајот
Осврнувајќи се на барањата за оставка од министерот Панче Тошковски, премиерот ја обвини опозицијата дека има идентични позиции со бугарското политичко раководство.
Според неговата оценка, случајот се користи за создавање политичка тема со која би се нанела штета врз рејтингот на владејачката коалиција.
„Намерата е да се создаде политичка тема за која претпоставиле дека ќе влијае на рејтингот на владејачката коалиција, односно на ВМРО-ДПМНЕ, и на тој начин ќе обезбедат одредена корист за опозицијата“, рече Мицкоски.
