Пратеничката од ВМРО-ДПМНЕ, Дафина Стојаноска, во емисијата „Колегиум“ на телевизија Алфа се осврна на извештајот на Европската комисија, состојбите во правосудството и евроинтегративниот процес. Таа ја нагласи потребата од конкретни гаранции дека евентуалните уставни измени нема да бидат проследени со нови билатерални условувања за Македонија.
Коментирајќи ги изјавите на Андреј Жерновски, Стојаноска оцени дека актуелните проблеми во правосудството се последица на седумгодишното владеење на СДС.
„Сето тоа е последица од нив. Политизирано е од нив, а без пари заради нив. Тие без пари не само правосудството, цела држава ја оставија. И сега тој е еден гласноговорник којшто ви кажува што не функционира, ја повикува Лаура Ковеши. Човек којшто не верува во сопствените институции. Тоа е нивната матрица. За нив авторитет е некој однадвор, немаат авторитет тука дома. И сега ништо не е поразлично од времето на Заев, освен што се опозиција“, рече Стојаноска.
Таа посочи дека претходната власт ги презела обврските, а сегашната го носи товарот од нивното спроведување. Според неа, одговорноста за состојбата со евроинтеграциите не може да се префрли исклучиво врз соседните држави.
Стојаноска истакна дека и евроамбасадорот оценил оти годинешниот извештај е подобар од минатогодишниот, посочувајќи напредок во реформите, образованието, надворешната и безбедносната политика. Сепак, нагласи дека за уставните измени се потребни јасни гаранции.
„Милион пати сме кажале и ќе повториме дека апсолутно не може тоа да се случи без некој конкретно да ни гарантира дека, ако евентуално се направат уставни измени, после тоа исклучиво ќе зависиме од мерит-системот, односно од она што ќе го спроведеме како реформи“, истакна Стојаноска.
Таа додаде дека политичари од Бугарија постојано нагласуваат оти уставните измени не се единствениот услов за напредок на Македонија на европскиот пат. Истовремено, ја критикуваше СДС дека повикува на нивно спроведување без обезбедени гаранции, иако тврди дека го зацврстила статусот на македонскиот јазик.
Според Стојаноска, Македонија би ги сносела последиците доколку ги исполни барањата, а процесот повторно биде блокиран, додека Бугарија веќе е членка на Европската Унија.
„Понудивме опција да имаме одложено дејство или на крајот, последниот ден, кога сè ќе заврши, тогаш да ги направиме уставните измени, ако велиме дека намерите на источниот сосед се чесни“, рече таа.
Стојаноска се осврна и на акцискиот план за малцинствата, тврдејќи дека неговото усвојување е прифатливо за 26 земји членки, а дека само една има проблем со него.
„Кој е тој што го кочи европскиот процес? Какви политики водеа, такви резултати доведоа, и сега ќе ви кажуваат дека ВМРО-ДПМНЕ го кочи европскиот пат. Далеку од тоа“, заклучи Стојаноска.
