Општина Маврово и Ростуше обезбеди еднократна парична поддршка од 6.000 денари, училиштен ранец и комплетен школски прибор за секое прваче запишано во општинските основни училишта.
Како што информираат од Општината, мерката се реализира согласно програмските определби и приоритети на градоначалникот Онер Јакупоски, насочени кон поддршка на семејствата и унапредување на образованието.
„За секое запишано прваче во сите општински основни училишта обезбедивме еднократна парична поддршка од 6.000 денари, училиштен ранец и комплетен прибор за почетокот на учебната година“, соопштија од општинскиот Сектор за односи со јавноста.
Целта на мерката е да им се олеснат подготовките на семејствата за почетокот на учебната година, а истовремено да им се донесе радост на најмладите при нивниот прв чекор во образовниот процес.
„Првачињата се нашата иднина и наша најголема радост. Наш приоритет е да им овозможиме подобри услови за учење и безгрижно детство. Со оваа поддршка сакаме да им посакаме успешен почеток и да им олесниме на нивните родители во овој важен момент“, изјави градоначалникот Онер Јакупоски.
Тој на сите ученици и наставници им посака среќен и успешен почеток на новата учебна година, исполнет со нови знаења и постигнувања.
Во Општина Маврово и Ростуше функционираат четири основни училишта – во Ростуше, Скудриње, Маврово Анови и Жировница, како и гимназија во Ростуше.
