По повод 60-годишнината од смртта на револуционерот и учесник во создавањето на современата македонска држава, Павел Шатев, денес на светонеделските гробишта во Битола се одржа панихида која ја изведоа свештеници од Македонската православна црква.

Сеќавања за животот и делото на Павел Патев искажа историчарот Тодор Коцевски од Кратово, каде Шатев е роден во 1882 година, а починал на 30 јануари 1951 година во Битола, каде е и погребан.

Гемиџијата Павел Шатев бил сведок на солунското револуционерно дело од 1903 година, во 1925 година учествувал во дејствувањето на ВМРО (Обединета), бил и делегат на Првото заседание на АСНОМ и прв министер за правосудство во првата Влада на слободна Македонија. Шатев имаше докторирано правни науки во Брисел, а по чистките на инфорбирото во 1948 година, бил уапсен и 11 месеци задржан во истражниот затвор во Скопје, а потоа испратен во Битола во домашен притвор.

- Животот и делото на Шатев е учебник за младите генерации. Чествувањата за Шатев ги возобновивме и сеќавањето за големиот револуционер нема да престане, посочи градоначалникот Владимир Талески кој во името на општина Битола положи свежо цвеќе на вечното почивалиште на Павел Шатев.