Минатата среда, 12.08.2015 год., во просториите на Културниот центар Илинден во Рогдал, Австралиско македонскиот театар од Сиднеј го одржа својот Генерален годишен состанок на кој покрај тоа што се направи избор на нов Управен одбор се разгледа извештајот за минатогодишната активност како и плановите и програмите за наредните една до две години.
Во минатата финансиска година театарот после успешната турнеја во Македонија имаше можност да настапи со драмата Борење со мечка во Мелбурн и Џилонг каде се изведоа три престави. Потоа следеше новата продукција The Fence (Ограда) со шест престави во Сиднеј и Волонгонг како и комедијата Доктор жими мајка од која се дадоа шест престави во Сиднеј, Волонгонг и Њукастел.
Се забележа дека драмата Борење со мечка, која се работеше во проектот за борбата против кенцорозно заболување Alive and Out There, беше номинирана и влезе во финалето за Australian Multicultural Marketing Awards. Исто така Театарот оваа година за својата долгогодишна плодна работа во промовирање на македонскиот јазик и култура ја доби престижната Повелба од претседателот на Република Македонија Д-р Ѓорѓе Иванов.
За успешната работа на театарот се забележа групната работа на сите членови а посебно им беше заблагодарено на Сашко Вељанов, Сашо Димовски, Владо Сазданов, Иван Трпоски и Зора Сазданов.
Во однос плановите за наредните неколку години се изложија проекти за можни успешни продукции на македонски и англиски јазик.
На крајот од средбата покрај заедничката фотографија со Повелбата од претседателот Иванов, на Антонио Нешковски му беше прославен 18-тиот роденден со желба да продолжи неговата глумеча кариера и животот да му биде исполнет со среќа и љубов.
Душан Ристевски
