ДЕЛ ОД КНИГАТА „ВО АВСТРАЛИЈА КАКО ДОМА“
При нашата посета во Сиднеј ни беше речено дека Македонското културно-уметничко друштво „Илинден“ од Рокдеил, е ороводник меѓу бројните културно-уметнички друштва во државата Нов Јужен Велс. Тоа било формирано на 26 ноември 1966 година од група Македонци, ентузијасти, кои, одделени од Македонија, преку орото, песната и музиката ја изразувале силната љубов кон родната земја- Македонија.
Со отворањето на портите на Македонската православна црква „Света Петка“, во ноември 1976 година, друштвото „Илинден“ навлегло во една нова фаза на постигнување резултати. Имено, во друштвото се формирал Одбор од голем број активисти кои во исто време имале задолженија и во црковната општина и кои решиле тоа да биде во состав на црквата. Членовите на друштвото на најдостоен начин го презентирале фолклор пред македонските доселеници и другите етнички групи кои живеат во Австралија.
Инаку, Македонското културно-уметничко друштво „Илинден“ од Рокдеил, предградие на Сиднеј, каде што живеат повеќе од дваесетина илјади наши луѓе, е едно од најстарите и најактивните македонски друштва на петтиот континент. Работи во составот на МПЦО „Света Петка“, и во него досега членувале над 2.000 млади играорци, музичари, пејачи и други ентузијасти.
Во периодот од скоро педесет години КУД „Илинден“ учествувало на многу етнички фестивали, црковни и други манифестации и било достоен амбасадор на македонската игра и песна. Повеќе пати гостувале во Република Македонија и учествувале на бројни манифестации со постигнати видни резултати. Оваа година македонското културно-уметничко друштво во иселеништвото го слави своето педесетгодишно постоење, исполнето со стотици успешни концерти, со многубројни награди и признанија и со многу овации и аплаузи за успешната изведба на богатиот македонски национален фолклор. Денес претседател на КУД „Илинден“ е истакнатиот иселеник Пеце Наумовски, а кореограф е познатиот фолклорист Крис Каранфиловски.
Бевме информирани дека почетокот не беше лесен. Друштвото работело во тешки услови, меѓутоа желбата за организираност и афирмација на македонскиот фолклор била голема. Се започнало со организирање на игранки, прослави и други свечености на кои се афирмирале младите фолклористи бурно поздравувани и подржувани од публиката на сите нивни настапи. Подоцна во состав на Друштвото се основале драмска и фудбалска секција, кои имале за цел да ги опфатат новите генерации Македонци да се приклучат во севкупното живеење на доселениците од Македонија. Прв претседател на Друштвото бил Ристо Велковски, а прва играорка Лена Белчева.
При нашата посета разговаравме со еден од претседателите на КУД „Илинден“, истакнатиот иселеник Кире Паовски, по потекло од Цапари, Битолско, за кое често се вели дека небаре цело село се преселило во Рокдеил. Кире е вљубеник во својот народ и голем активист во македонската заедница. Бил претседател на комисијата за културно-просветна работа при црквата „Света Петка“ и претседател на КУД „Илинден“ и повеќе пати на чело на оваа македонска асоцијација која постигнува видни резултати на полето на ширењето на македонските обичаи, традиции, песната и игрите и македонскиот народен фолклор на австралискиот континент.
Бевме информирани дека во изминатиот период членувале илјадници Македонци, претежно родени во Австралија. Друштвото постојано учествувало на најразлични фолклорни фестивали меѓу кои заслужува да се споменат, меѓу другите, настапите на Етничкиот фолклорен фестивал „Квантас“, што се одржа на 6 јуни 1991 година во познатата светска куќа „Опера Хаус“ под покровителство на Владата на Нов Јужен Велс, каде што достојно го презентираше македонскиот фолклор со другите етнички групи што живеат на петтиот континент.
За успехот на фестивалот КУД „Илинден“ беше ставено во таканаречената „Златна група“ и доби парична награда. Исто така, Друштвото учествувал на фестивалот „Свети Кирил и Методиј“ во Розбери, што се одржа во чест на националниот празник Илинден, како и на фестивалот „Илинден“ во Рокдеил, потоа настапи на првиот фолк-фестивал „Македонија 91“ во Канбера, а гостуваше во Њукасел и во многу други места ширум Австралија.
Прославата на 49-годишното постоење на Македонското културно-уметничко друштво „Илинден“ е уште еден доказ за континуитетот во етно-презентацијата и воопшто за достигањата на македонските доселеници во Сиднеј, каде што иако толку далеку од дедовската земја, Македонија ги негуваат, чуваат и афирмираат националните и културните вредности како дел од меѓунационалниот и демократскиот мозаик на Австралија.
Покрај Македонското културно-уметничко друштво „Илинден“, од активностите на Македонците треба да се одбележи дека во Сиднеј постојан голем број друштва и различни асоцијации на доселениците од Македонија. Меѓу другите се: Македонскиот просветно-училишен одбор за Нов Јужен Велс; Македонското пензионерско друштво “Методија Андонов – Ченто”, кое е формирано на 20 март 1990 година од членови кои црквуваат во “Св. Недела” во Кабрамата; во повеќе градови на Австралија се одржуваат македонски фолклорни фестивали на новокомпонирани песни; во Илавара постои Македонскиот театар што го носи името на нејзиниот режисер и основач Благоја Нешковски, млад талентиран уметник што прерано го заврши својот живот; во Илавара е формиран Македонски добротворен центар, како продолжение на Македонското добротворно здружение формирано во 1983 година; КУД “Охридски бисери” од Беркли; КУД “11 Октомври” од Илавара; КУД “Вардар” од Грингила; КУД “Вардар” од Бенгстаун и други македонски друштва и асоцијации во Нов Јужен Велс.
Исто така, Катедрата за македонски јазик на Универзитетот „Маквори“ во Сиднеј, е една од најзначајните образовни институции за Македонците и бројните лингвисти во Сиднеј. Таа е основана во 1984 година и до денес голем број лингвисти ги завршиле своите студии по македонски јазик и литература на престижниот универзитет „Маквори“. Тоа е поврда за признавањето на македонскиот јазик и литература, за македонска нација и вистината за Република Македонија.
Продолжува
Пишува: СЛАВЕ КАТИН
Оваа е-пошта е заштитена од spambots, треба да вклучите JavaScript за да ја видите
www.slavekatin.com
