Низ звуците од Златоустовата литургија и со благослов од Архиепископот Г.Г. Стефан и Папата Франсис и со претставници на Католичката црква во Велехрад- Чешката, изложбата македонски ракописи ја отвори амбасадорот на Р. М. во Чешката Република Паскал Стојчески.
Изложбата Manuscripta Glagolitica содржи експонати на глаголично и кирилично писмо, вклучувајќи и репродукции на вредни ракописи од Македонија, денес во збирките на НУБ Св. Климент Охридски и други библиотеки во светот и ќе биде отворена до крајот на месец јуни.
За проектот и македонското ко- партнерство во прославувањето на јубилејот зборуваше Гоче Мирчевски, претседател на Македонската заедница во Чешка, а за мисиите на светите браќа Кирил и Методиј со посебна нагласка на првата – Брегалничката мисија говореше амбасадорот Мартин Треневски, истражувач и голем почитувач на солунските браќа.
Треневски посебно се задржа на сознанијата во голем број житија за светите Кирил и Методиј дека првото словенско писмо – глаголицата и првите црковни книги на старомакедонски односно старословенски јазик се напишани за потребите на Македонците во Струмичко – Брегалничката област.
Истиот ден попладнето во епископскиот центар Оломоуц се одржа голем собир на Македонците – деца бегалци од егејскиот дел на Македонија кои ги одбележаа трите годишнини:
110 години од Илинденското востание ,
100 години од поделбите на Македонија и Букурешкиот договор и
65 години од егзодусот на Македонците од Беломорска Македонија.
Димитри КИРЈАКОВСКИ
15. јуни 2013, Велехрад Чешка
