Досегашниот претседател на ЗМРХ, Орце Ламбевски поднесе неотповиклива оставка поради значително зголемени работни обврски на приватен план
На 17 мај 2014 година во просториите на МКД „Илинден“ во Риека се одржа Редовното Собрание на Заедницата на Македонците во РХ, на кое присуствуваа и ценетите гости амбасадорката на РМ во РХ, Даниела Караѓозоска и заменикот на претседателот на Координацијата на советите и претставниците на МНМ во РХ, Михаило Давчевски. Собранието го отвори претседателот на Заедницата Орце Ламбевски, кој со пригоден говор ги поздрави присутните и ѝ даде збор на амбасадорката. Таа се заблагодари на поканата и изрази жалење што Орце Ламбевски дава неотповиклива оставка на функцијата претседател на Заедницата, упатувајќи му благодарност за доброто вршење на функцијата и одличната соработка со Амбасадата на РМ во РХ, а на присутните им посака успешна и конструктивна работа на седницата. Потоа претседателот Ламбевски го прочита поздравното писмо упатено од свештеникот на МПЦ во РХ, протојереј Кирко Велински, кој беше спречен да присуствува на Собранието.
Со утврдувањето кфорум за донесување на правно важечки одлуки, седницата продолжи по усвоениот дневен ред. Претседателот Ламбевски ги поднесе Извештајот за работата и Годишниот финансиски извештај на Заедницата за 2012 и 2013 година, како и се` она што беше извршено во текот на неговиот мандат. Во врска со неговата оставка, тој рече дека поради значително зголемени работни обврски на приватен план, веќе не е во можност квалитетно да ја извршува оваа функција и затоа ја препушта на некој друг што ќе може да ја преземе таа одговорност и достојно да ја извршува функцијата претседател на Заедницата, со тоа дека тој и понатаму ќе биде достапен за секој вид на соработка.
Претседателката на Надзорниот одбор, Виолета Штерјова, го поднесе Извештајот за извршената контрола на финансиското и општото работење на Заедницата за 2012 и 2013 година. Се расправаше и за Планот и програмата за работа и Финансискиот план на заедницата за 2014 година. Сите Извештаи и планови беа усвоени од делегатите на Собранието. Од одржувањето на минатото Собрание дојде до промени на претседателите во МКД во Риека и во Осиек.
