Програмски цели на ВМРО – Демократска Партија за Македонско Национално Единство-1990 г.

Македонија над се ! 1990 година

МАКЕДОНИЈА НАД СЕ !!!

1. ВМРО – ДПМНЕ ќе се бори за враќањето на гордоста и достоинството на македонскиот човек, македонскиот народ и македонската држава.
2. ВМРО – ДПМНЕ ќе работи за целосно духовно, политичко, економско и етничко обединување на распарчениот македонски народ и држава по линијата обединет Балкан (Балканска конфедерација) и обединета Европа.
3. ВМРО – ДПМНЕ ќе се залага за конфедеративен статус на македонската држава во рамките на СФРЈ, како единствена гаранција за целосниот македонски суверенитет и како основен предуслов за преговорите со соседните земји за обединување на Македонија.
4. ВМРО – ДПМНЕ ќе се бори против секое тоталитаристичко владеење и властвување во македонската држава; ќе се бори за целосни граѓански слободи и права; секој граѓанин да има право да бира и да биде биран на изборите за претставничките тела и другите општествени форуми и организации, слобода на говорот, слобода на печатот, слобода на организирањето, слобода на вероисповеста, рамноправност на половите, еднаквост пред судовите, социјална правда.
5. ВМРО – ДПМНЕ ќе се залага за суверена македонска државна економија, нејзин брз развој во условите на пазарна економија и приватната сопственост како носител на новата економска политика.
6. ВМРО – ДПМНЕ да има за трајна грижата за македонскиот народ во незаконски присвоените делови на Грција, Бугарија, Србија и Албанија, како и грижата кон разните народности и етнички групи кои живеат на територијата на македонската држава.
7. ВМРО – ДПМНЕ е за самостојна македонска надворешна политика, која ќе тргнува од интересите на Македонија и за потполно нов однос кон македонската економска и политичка емиграција, кои во минатото беа претставувани во македонската јавност како непријатели. За национално помирување на сите Македонци кои остануваат до духот на бесмртниот Илинденски идеал.
8. ВМРО – ДПМНЕ е за протекционизам на македонскиот културен простор, во кој ќе владеат подеднакво пазарната економија, но и законот на естетската вредност. Културата како најсилно оружје на новата македонска држава, за реформа на македонскиот литературен јазик и неговата заштита.
9. ВМРО – ДПМНЕ е за македонска народна армија во склоп на заедничката братска југословенска армија, како носител на одбраната во македонската држава.
10. ВМРО – ДПМНЕ ќе се залага за целосно преиспитување на постарата и поновата македонска историја, преиспитување и преоценување како на личностите така и на настаните, ослободени од било какви идеолошки предрасуди или цензури. За пишување и учење на заедничката историја од трите дела на Македонија.
11. ВМРО – ДПМНЕ ќе работи за здрава, заштитена и еколошки чиста животна средина во Македонија.

ИНИЦИЈАТИВЕН ОДБОР НА ВМРО – ДПМНЕ
СКОПЈЕ