Мане Јаковлески
РСВР – СРМ
СДБ – II – Сектор
[редактирано]
Ев. бр. 20
21.01.1983 година
Скопје
СЛУЖБЕНА БЕЛЕШКА
На 17.01.1983 година обавен е разговор со оперативната позиција [редактирано] од Западен Берлин, во текот на кој го презентира следното:
„При крајот на 1981 година во Западен Берлин дојде ПУРЕВСКИ (сите го знаат како „Пуре“) и од самиот почеток почна да доаѓа во ресторанот на Гоце Јаковлевски. Според негови кажувања, бил од околината на Берово, а пред да дојде во Берлин, во Идризово бил во затвор година и пол, за сообраќајка. Таму се запознал со Драган Богдановски, а подоцна и се спријателил.
Во мое присуство на Јаковлевски му кажуваше дека Богдановски му кажал како бил киднапиран и однесен во Скопје. Еве ја верзијата што Пуревски наводно ја слушнал од Богдановски:
Богдановски бил поканет во станот на некој Ѓоко во Париз. Кога стасал таму, покрај Ѓоко имало уште две машки лица што не ги познавал. Во еден момент Богдановски бил нападнат од грб од едното лице, а другото лице му ставило инекција во вратот. Со инекцијата бил онесвестен, а кога се освестил видел дека се наоѓа во Југославија. Незнаел на кој начин бил пренесен во Југославија. Подоцна дознал дека Ѓоко за оваа работа [нечитливо] добил нов стан во Скопје, каде и сега живеел.“
– 2 –
По извршените проверки во КПУ „Идризово“ установено е дека во затвор бил Пуреловски Димко, од татко Никола, роден 1952 година во с. Будинарци – Берово, радио механичар, осуден на 18 месеци за сообраќајна несреќа, од затвор излегол на 2.10.1981 година, пуштен 2 месеци порано – условно.
