Премиерот на Нов Јужен Велс , Hon. Michael Baird, за време Денот на Австралија во јануари оваа година на нашиот познат општественик, поет и драматург Душан Ристевски, му додели државно признание (Community Service Award) за неговиот неизмерен  допринос во австралјанската заедница. Од името на Премиерот, плакетата му ја предаде членот во парламентот од Рогдаел Госп. John Flowers, кој на Душан наискрено му се заблагодари од владата на Нов Јужен Велс за неговото долгодишно работење во мултикултурна Австралија.

Имено, Душан приближно 40 години активно е вклучен во општествениот живот во Сиднеј. Покрај тоа што е вклучен во Литературното друштво „Григор Прличев“ тој има одиграно голема улога во воспоставување на социјални служби за емигрантите, посебно за Македонците, во Сиднеј. Тој бил главниот носител на воспоставување на посебни служби за жените, младите и постарите граѓани преку Македонско австралиското добротворно друштво и Емигрантскиот изворен центар во регионот Св Ѓорѓи, а за последните 20 години е еден од најважните носители во воспоставување на соодветни програми за менталното здравје во оваа држава. За неговото иноваторство во употребување на театарот како средство за намалување стигмата од менталните и канцорозните болести бил и наградуван, а тој приод веќе се употребува од повеќе етнички заедници во Австралија како и интернационално. Неговите прирачници за обучување на здраствените работници се применуваат нашироко. Минатата година успешно се презентира драмата „The Fence - Ограда“ која имаше за цел да се промовира хармонија и толеранција во мултикултурното австралиско општество.

Како поет Душан досега има објавено шест книги поезија за што и беше награден со наградата Иселеничка грамота  и „Стојан Христов“ на СВП,  а на сцена преку Австралиско македонскиот театар од Сиднеј досега има поставено осум врвни драмски дела кои обработуваат социјални и семејни теми тесно поврзани со животот на Македонците во Австралија.

Честитки до Душан за неговата неуморна работа преку која успешно ја промовира македонската култура и нација овде во Австралија.

Иван Трпоски

Фото: Госп. John Flowers и Душан Ристевски