Минатиот понеделник, 12 октомври, во просториите на сиднејската Опера (Sydney Opera House) се одржа Гала церемонија при што се доделија наградите за Australian Multicultural Marketing Awards за 2015 година. Овие престижни награди се доделуваат под организација и покровителство на владата на Нов Јужен Велс и установата Multicultural NSW (поранешната Комисија за етнички работи) и на министерот за Мултикултурализам Hon. John Ajaka MLC.

За наградите во осумте категории беа пристигнати стотици номинации од цела австралија за проекти работени од владини и невладини институции, организации, клубови и бизниси. Во категоријата за Уметност и Култура оваа престижна награда ја доби Австралиско македонскиот театар од Сиднеј за преставата Ограда (The Fence) од Душан Ристевски. Оваа автентична престава која е работена на англиски јазик како дел од проектот „Живеење во хармонија“ беше прикажана во Сиднеј и Волонгонг и забележа голем успех. Работена во режија на Стефо Нанцу, а во главна улога на Стефо Нанцу и Васко Србиновски, театарот заангажира актери покрај македонските така и од другите националности по потекло од Либан, Јордан, Виетнам и еден Абориџанец.

Убаво е да се забележи дека овие престижни награди се доделуваат за последните 26 години и ова е прва македонска организација што има добиено ваква награда. Оваа година исто така Театарот беше награден со Повелба од претседателот на Македонија Ѓорге Иванов за промоција на македонската култура и нација.

Од лево на десно: Мохамед, Васко, Душан, министерот Џон Аџака и Џоумана во Опера Хаус  на 12.10.2015 год.

Инаку АМТ од Сиднеј на сцена има поставено осум драмски дела, a за идната година планира да ги постави на сцена драмите „Куферот“ и „Баба се мажи“. Исто така се најавува и прикажување на монодрама за Методија Андонов - Ченто кон крајот на ноември оваа година.

Честитки до членовите на Театарот кои успешно успеваат да ја промовираат македонската култура и нација во Австралија.

Иван Трпоски