Во Институтот за македонски јазик „Крсте Мисирков“, во присуство на голем број гости, лингвисти, проучувачи на македонскиот јазик, професори, сегашни и поранешни вработени, денеска беше одбележана шеесетгодишнината од основањето на оваа научна установа.
На свеченоста, на која претседателот на Република Македонија, д-р Ѓорге Иванов, по повод јубилејот, на Институтот му го додели признанието Повелба на Република Македонија, министерката за култура Елизабета Канческа-Милевска истакна дека станува збор за институција која е вистински афирматор на научната вистина за Македонија и за македонскиот јазик.
–Македонскиот јазик е дел од нашето богато наследство, тој е компонента која го детерминира нашиот идентитет и без него, идентификацијата во светски контекст е невозможна. Токму затоа, грижата за македонскиот јазик е наша неодминлива обврска што мораме да ја демонстрираме на сите рамништа и во сите сфери на неговата употреба – истакна министерката за култура.
Таа ја посочи успешната соработка на Институтот за македонски јазик со Министерството за култура, со чија поддршка е реализиран голем дел од проектите на Институтот.
– Ќе ги споменам многубројните монографски трудови за македонскиот јазик што ги издаде Институтот, како и капиталната публикација која се вброи во врвните достигнувања на македонската лингвистика, делото од највисок национален интерес, Толковниот речник на македонскиот јазик. Сиве овие активности ги промовираа спецификите кои му се иманентни на македонскиот јазик, во општословенскиот и балканскиот јазичен простор – рече Канческа-Милевска.
Претседателот на Република Македонија, д-р Ѓорге Иванов, на денешната свеченост потенцираше дека низ децениите, Институтот им помогна на многу македонисти, на многу македонски пријатели од целиот свет да ја разберат Македонија, афирмирајќи ги со тоа македонскиот јазик и македонската литература и култура.
–Затоа, како претседател на Република Македонија, донесов одлука на Институтот за македонски јазик „Крсте Мисирков“ од Скопје да му се додели признанието Повелба на Република Македонија. Повелба со која ја искажуваме нашата искрена благодарност на Институтот за шестдецениската научноистражувачка дејност на полето на проучување и негување на македонскиот јазик. Повелба со која ја изразуваме нашата почит кон вработените, кон членовите на научноистражувачкиот кадар што веќе 60 години доследно и посветено ја исполнуваат мисијата и визијата на Крсте Петков-Мисирков – рече претседателот Иванов.
