ВМРО-ДПМНЕ обвинува дека митото од 2.000 евра за поранешниот директор на Царинската управа, Стефан Богоев, било само прва од неколкуте исплати што, според нив, требало да ги добие за местен тендер во Царина, вреден 18 милиони денари.
Пратеникот Бране Петрушевски изјави дека, според информации добиени од свиркачи, Богоев митото го договарал во директна комуникација со Александар Спирковски – Џемо, преку Вибер-конверзација.
„Џемо, кој ја застапувал фирмата што го добила тендерот вреден 18 милиони денари, договорил и финансиски подароци за Богац. Само една од траншите што требало да ги добие Богац била во висина од над 110 илјади денари“, истакна Петрушевски.
Тој побара јавноста да добие одговор колку пари требало да добие Богоев за, како што рече, да го намести тендерот за одржување хигиена на граничните премини и терминали.
„Јавноста заслужува одговори. Колку пари требало да добие Богоев, поранешниот директор на Царинската управа, за да го намести овој тендер за одржување на хигиена на граничните премини и терминали, вреден 18 милиони денари?“, праша Петрушевски.
Тој во изјавата упати и тешки обвинувања кон Спирковски, посочувајќи дека во прилепските кругови, како што рече, добро се знаело кој е Џемо.
„Тепач на свои сограѓани кои не мислат како него, човек кој бил одговорен за поткупување гласачи и главен кадровик и сива еминенција во огранокот на СДС во Прилеп“, рече Петрушевски.
Според него, случајот е уште една потврда дека матрицата на СДС не се менува.
„Од другата страна го имаме несудениот наследник на Зоран Заев, детето на СДММ, кој тргнал по стапките на неговиот ментор. Ако Заев земаше едно евро за брат му, Богац зема илјадници, ама за него. Матрицата на СДС не се менува – криминали, афери, скандали, тендери и провизии. Тоа е вистинското лице на СДС“, порача Петрушевски.
