Европската слободна алијанса усвои декларација со која бара официјално извинување за репресиите врз Македонците во Бугарија, спроведување на пресудите од Европскиот суд за човекови права и прекин на двојните стандарди во однос на малцинските права во Европа.
Европската слободна алијанса (European Free Alliance – ЕФА), европска политичка партија која ги обединува регионалните, автономните и малцинските политички партии во Европа и е застапена во Европскиот парламент, на своето годишно собрание едногласно усвои Декларација со која бара Бугарија да се извини за сите злосторства извршени врз македонското малцинство за време на комунистичкиот период.
Во документот се бара и целосно спроведување на 14-те пресуди на Европскиот суд за човекови права кои се однесуваат на правото на регистрација и дејствување на македонските организации во Бугарија.
ЕФА оценува дека состојбата со човековите права на Македонците во Бугарија останува сериозен проблем и смета дека Европската Унија мора поодлучно да инсистира оваа земја-членка да ги почитува своите законски и меѓународни обврски, особено во областа на човековите и малцинските права.
Во Декларацијата се критикува и примената на двојни стандарди во рамките на Европската Унија, односно различниот пристап кон земјите-членки и земјите-кандидатки кога станува збор за заштитата на националните малцинства и почитувањето на нивните права.
ЕФА го отвора и прашањето за невклучувањето на претставник на македонската заедница во Националниот совет за соработка за етнички и интеграциски прашања во Бугарија, оценувајќи дека е неопходно Македонците да добијат соодветна институционална застапеност и можност за учество во процесите што директно ги засегаат.
Посебно внимание во документот е посветено на историските репресии врз Македонците во Бугарија. Во Декларацијата се бара официјално извинување од бугарската држава за политиките спроведувани во комунистичкиот период.
„Ова мора да ги признае илјадниците Македонци кои беа тепани, присилно раселени, понижени, казнувани, затворани и убиени поради изразувањето на својот етнички идентитет и поради спротивставувањето на политиките на денационализација“, се наведува во Декларацијата на ЕФА.
Покрај оваа декларација, на годинешното собрание ЕФА усвои и Резолуција со која ги осудува политичките притисоци врз Македонците и ја повикува Европската комисија да покрене истрага за состојбата со македонското малцинство во Албанија.
Усвојувањето на овие документи претставува уште едно отворање на прашањето за положбата на Македонците надвор од границите на Македонија на европско ниво и повик до институциите на Европската Унија доследно да ги применуваат принципите на еднаквост, човекови права и заштита на националните малцинства.