Македонска Нација
Од Брисел пристигна директен демант на тезите на СДС – Македонија е меѓу земјите со најголем реформски напредок во Западен Балкан
СДС повторно покажува дека, кога нема политичка визија, посегнува по блокади и менување на темата. Откако со години ја туркаа темата за внесување на Бугарите во Уставот без јасни и цврсти гаранции за Македонија, а потоа секојдневно тврдеа дека земјата не спроведува реформи, сега истиот модел на кочење го префрлија врз Изборниот законик.
Одеднаш, за СДС „антидемократски“ било македонската дијаспора да гласа, иако повеќе од 140 држави во светот им го гарантираат тоа право на своите државјани во странство.
Но токму во моментот кога Филипче и СДС ја менуваат темата, од Европската Унија пристигна информација што директно ги демантира нивните тврдења.
Македонија е меѓу трите земји од Западен Балкан, заедно со Црна Гора и Албанија, кои би можеле да добијат дополнителна финансиска поддршка од Европската Унија преку прераспределба на средствата од Планот за раст.
Ова го објави Euronews, повикувајќи се на двајца официјални претставници на ЕУ, според кои Европската комисија е подготвена да го насочи финансирањето кон земјите што покажуваат најголем напредок во спроведувањето на реформите потребни за пристапување во Европската Унија.
Ова е силен политички демант на тезата што Филипче и СДС постојано ја пласираат – дека Македонија наводно не спроведува реформи и дека е закочена на европскиот пат.
Напротив, според оценките што ги пренесува Euronews, Македонија е препознаена како земја со добар реформски резултат и како дел од групата што има најголем напредок во процесот на пристапување.
Фондот за реформи и раст за Западен Балкан беше воспоставен во 2024 година, со цел финансиски да ги поттикне земјите кандидати да ги спроведат реформите потребни за членство во ЕУ. Инструментот го опфаќа периодот 2024–2027 година и располага со вкупно 6 милијарди евра.
Според податоците на Европската комисија, досега се ослободени околу 673 милиони евра, а речиси целото досегашно финансирање било насочено кон три од шесте земји кандидати – Црна Гора, Албанија и Македонија.
Механизмот е јасен: земјите добиваат средства само ако ги исполнат договорените реформски чекори во предвидените рокови. Доколку тоа не се случи, Европската комисија може да ги задржи средствата и да ги прераспредели кон други корисници.
„Каде што реформските чекори не се исполнети и истекол грејс периодот, соодветните средства може да бидат прераспределени меѓу другите корисници“, изјавил портпарол на Европската комисија за Euronews.
Токму затоа се отвора сериозно политичко прашање: ако Македонија не спроведува реформи, како што тврди СДС, зошто тогаш Европската Унија ја става меѓу земјите што можат да добијат дополнителна финансиска поддршка?
Како сега Филипче и СДС ќе го објаснат овој факт?
Дали затоа деновиве ја префрлаат јавната дебата на друга тема? Дали затоа повторно ја отвораат темата за македонската дијаспора, обидувајќи се да го прикријат фактот дека нивната теза за „немање реформи“ паѓа во вода пред оценките што доаѓаат од самата Европска Унија?
Пораката е јасна – реформите се мерат според резултати, а не според прес-конференции на Филипче и СДС.
