Македонска Нација
Портпаролот на ВМРО-ДПМНЕ, Валентин Манасиевски, денеска порача дека Македонија нема да спроведе уставни измени без јасни, цврсти и писмени гаранции од Европската Унија, нагласувајќи дека државата нема повторно да прави отстапки без сигурност дека тие ќе донесат реален напредок во евроинтегративниот процес.
„Македонија без гаранции од ЕУ нема да спроведе уставни измени. Венко Филипче на својот бугарски претседател нека му пренесе дека очекуваме исполнување на пресудите од Стразбур“, изјави Манасиевски.
Тој истакна дека Македонија веќе платила висока цена поради, како што рече, погрешните политики на СДС и нивното раководство во минатото.
„Македонија поради лековерноста и погрешните политики на СДС, предводени од Зоран Заев и Венко Филипче, плати прескапа цена со промената на уставното име на државата. Затоа овој пат уставни измени без јасни, цврсти и писмени гаранции во форма на заклучоци од Европската Унија нема да има“, нагласи Манасиевски.
Според него, политиката на прифаќање условувања и диктати е завршена и новата Влада нема да дозволи носење одлуки на штета на националните интереси.
„Уцени и диктати какви што биле прифаќани досега, со Владата предводена од ВМРО-ДПМНЕ нема да има. Македонија и граѓаните немаат право повторно да бидат излажани. Нема повторно да се прават отстапки без гаранции, без заштита на националните интереси и без сигурност дека тие отстапки навистина ќе значат напредок во евроинтегративниот процес“, рече Манасиевски.
Во своето обраќање тој упати порака и до лидерот на СДС, Венко Филипче.
„Специјалниот бугарски пратеник Венко Филипче нека му пренесе на Радев дека додека не видиме испорака од нивна страна, Македонија нема да се помести ниту милиметар од својата политика“, порача Манасиевски.