Венко Филипче повторно докажува дека е подготвен да ја продолжи политиката на Зоран Заев, односно политиката на попуштање пред Бугарија и прифаќање барања кои, според ВМРО-ДПМНЕ, директно задираат во македонските национални и државни интереси.
Од ВМРО-ДПМНЕ велат дека новиот бугарски премиер, Румен Радев, не е непознат фактор во бугарската политика и дека неговите ставови кон Македонија, македонскиот јазик, народ, идентитет и историја се одамна познати на јавноста.
„Тој и досега јасно покажал дека Бугарија нема намера да отстапи од своите позиции, ниту да се повлече од условувањата кон Македонија. Напротив, очигледно е дека официјална Софија ќе продолжи со притисоци и блокади секогаш кога тоа ќе ѝ одговара“, стои во соопштението.
Од партијата оценуваат дека во вакви околности е потребен јасен и цврст став во одбрана на македонските интереси, но дека Филипче и СДС, како што наведуваат, избрале „антидржавен и бугарски пат“.
„Наместо да застанат на страната на Македонија, тие испраќаат јасна порака дека доколку дојдат на власт, би ги спровеле уставните измени и би прифатиле политики кои се во согласност со барањата на Бугарија“, наведуваат од ВМРО-ДПМНЕ.
Во соопштението се додава дека, според нив, Филипче и СДС немаат проблем со „откажување, попуштање и тргување со најважните национални прашања“, обвинувајќи ги дека тоа го прават поради лични и финансиски интереси.
„Тоа што Зоран Заев го започна, Венко Филипче очигледно е подготвен да го доврши“, се вели во соопштението на ВМРО-ДПМНЕ.
