Во рамки на официјалната посета на високата хрватска делегација, предводена од премиерот на Хрватска, Андреј Пленковиќ, беше потпишан Договор за стратешка соработка меѓу владите на Македонија и Хрватска од страна на премиерите Христијан Мицкоски и Андреј Пленковиќ.
Со овој стратешки договор, Македонија и Хрватска испраќаат јасна порака за зајакнување на меѓусебната соработка во повеќе области – економија, инфраструктура, енергетика, образование, туризам, европски интеграции и безбедност.
Хрватска, како членка на Европската Унија и НАТО, претставува важен партнер за Македонија во процесот на европска интеграција и споделување искуства од реформските процеси.
Премиерот Мицкоски истакна дека Македонија останува посветена на градење силни партнерства со пријателските држави од регионот и Европа, нагласувајќи дека ваквите договори отвораат нови можности за инвестиции, економски развој и регионална стабилност.
Од хрватска страна беше потенцирана поддршката за европската перспектива на Македонија и потребата од продлабочување на билатералните односи.
Посетата на високата хрватска делегација и потпишувањето на договорот се оценуваат како дипломатски успех и потврда за растечката соработка меѓу двете држави, кои ги поврзуваат историски пријателски односи, заеднички интереси и стремеж кон стабилен и развиен регион.
„Денешната посета има особено значење за нашите две држави, затоа што таа не претставува само дипломатска средба меѓу две влади, туку потврда на едно пријателство кое се градело со години, врз основа на заемна почит, разбирање, соработка и искрена поддршка“, истакна Мицкоски.
Тој додаде дека Република Хрватска е близок партнер, пријателска земја и сојузник во НАТО, со која Македонија дели заеднички интереси, слични регионални предизвици и визија за стабилен, безбеден и европски Западен Балкан.
Мицкоски потенцираше дека Договорот за стратешка соработка претставува повеќе од дипломатски акт и отвора рамка за долгорочно партнерство и продлабочување на односите во области од суштинско значење за иднината на двете држави.
„Нашата стратешка соработка ќе биде заснована врз принципите на заемно почитување, целосно уважување на суверенитетот, меѓународното право и заедничките интереси на нашите граѓани“, порача премиерот.
Во рамки на договорот, двете држави ќе работат на развој на конкретни иницијативи и проекти во транспортот, енергетиката, информатичките технологии, индустријата, производството, здравството, образованието, јавната безбедност, цивилната заштита, одбраната, сајбер-безбедноста и управувањето со границите.
Посебно значајно е што договорот отвора простор за подлабока поврзаност меѓу институциите, компаниите, инвеститорите, академската заедница, граѓанскиот сектор и експертските заедници на двете земји.
Една од најважните теми на разговорите била и европската интеграција. Хрватска, како земја што успешно го помина патот од кандидат до полноправна членка на Европската Унија, претставува важен пример и партнер за Македонија.
„За нас европската интеграција не е само надворешнополитичка цел. Тоа е процес на институционално созревање, владеење на правото, економски развој, модернизација и создавање подобри услови за живот за нашите граѓани“, нагласи Мицкоски, додавајќи дека Македонија ја цени континуираната поддршка што Хрватска ѝ ја дава на македонската европска перспектива.