Премиерот на Република Македонија, Христијан Мицкоски, утре (5 јуни) ќе учествува на Самитот Европска Унија – Западен Балкан, кој ќе се одржи во Тиват, Црна Гора, соопштија попладнево од Владата.
Самитот ќе ги собере лидерите на земјите од Западен Балкан и високи претставници на Европската Унија, а во фокусот на разговорите се очекува да бидат процесот на европска интеграција, економската соработка, инфраструктурното поврзување, реформските процеси и безбедносните предизвици во регионот.
Учество на ваквиот собир доаѓа во период кога Македонија настојува да го задржи европскиот курс и да обезбеди поголема поддршка за своите интеграциски аспирации. Воедно, самитот претставува можност за билатерални средби и размена на ставови со европските лидери за актуелните политички и економски прашања.
Се очекува премиерот Мицкоски да ги претстави позициите на Македонија во однос на европската перспектива на државата, реформските приоритети и потребата од фер и предвидлив пристап во процесот на проширување на Европската Унија.
Самитот во Тиват се одржува во време на засилени иницијативи за поблиско вклучување на земјите од Западен Балкан во европските политики и институции, како дел од пошироките напори за забрзување на интеграцијата на регионот во ЕУ.
