Премиерот Христијан Мицкоски изјави дека ги информирал партнерите во НАТО за сериозен дипломатски преседан во Бугарија, откако на социјалните мрежи била објавена заштитена дипломатска нота која, според него, ја загрозила безбедноста на неговото семејство.
Како што пренесе 4news.mk, станува збор за официјален документ што македонската амбасада во Софија го испратила до бугарското Министерство за внатрешни работи на 6 јануари 2026 година. Во нотата биле содржани детали за приватното тридневно патување на сопругата на премиерот, Рози Мицкоска, и нивниот помал син Антонио во зимскиот центар Пампорово.
Иако документот објавен на Фејсбук бил делумно редактиран, во него, според Мицкоски, останале видливи чувствителни безбедносни информации, меѓу кои службените возила, имињата на патниците, вооружувањето на обезбедувањето и радиофреквенцијата што ја користеле припадниците на придружбата.
По објавувањето на документот, на одредени пробугарски блогови била покрената медиумска кампања проследена со говор на омраза и содржини генерирани со вештачка интелигенција.
„Сигналите кои доаѓаат оттаму не ме прават оптимист. Сметам дека состојбата се радикализира. Вчера видовме еден преседан во дипломатијата, нешто што е невообичаена пракса во светот и можеби единствен случај од ваков вид. Замислете ние да ги објавуваме сите дипломатски ноти од нашиот источен сосед кои би биле интересни за јавноста“, изјави Мицкоски.
Тој нагласи дека за случајот ги информирал партнерите во НАТО, имајќи предвид дека Македонија е земја-членка на Алијансата, и јавно им се извинил на сопругата и синот за непријатностите на кои биле изложени.
Мицкоски оцени дека пораките што пристигнуваат од Софија укажуваат на радикализација на одредени позиции во Бугарија, но порача дека ваквите, како што ги нарече, „аматерски потези“ нема да ја одвлечат Владата од нејзините приоритети, пред сè економските реформи и подобрувањето на животниот стандард на граѓаните.
