Премиерот Христијан Мицкоски, за време на посетата на Соединетите Американски Држави, го истакна потенцијалот на антимонот во Македонија, минерал кој има големо стратешко значење, особено за одбранбената индустрија. Според Мицкоски, реализацијата на проектот може да ја зголеми важноста на Македонија како партнер, но и да придонесе за економскиот развој и животниот стандард на граѓаните.
„Антимон е критичен и редок минерал, најчесто користен во воената индустрија. Секако, постојат и некои други примени, но генерално, кога зборуваме за антимон, зборуваме за воената индустрија“, изјави Мицкоски.
Тој нагласи дека проектот има потенцијал да добие пошироко стратешко и економско значење за Македонија.
„И во тој поглед, мислам дека со завршувањето на овој проект ќе можеме да ја зголемиме важноста на мојата земја и истовремено да го зголемиме богатството на граѓаните и економскиот стандард, бидејќи, како што реков, според првите извештаи, резервите се многу поголеми од збирните резерви на денешните прв и втор продавач во светот“, рече Мицкоски.
Проектот е поврзан со наоѓалиштето на антимон кај селото Луке, Кривопаланечко. За време на актуелната посета на САД, Мицкоски повторно го посочи рудникот за антимон меѓу проектите за кои се разговара со американската страна.
Интересот за антимонот е особено голем поради неговото значење за стратешките синџири на снабдување и одбраната. Податоците на Геолошкиот институт на САД (USGS) покажуваат дека светското производство е концентрирано кај релативно мал број производители, додека американските власти вложуваат во обезбедување нови извори на овој критичен минерал.
Мицкоски и претходно во интервју за американскиот „Breitbart“ зборуваше за македонскиот антимон, наведувајќи дека се работи за големо наоѓалиште и дека идејата е минералот да се ископува во Македонија и да се пласира во САД, каде што би се користел, меѓу другото, за производство на воена опрема.
Доколку проценките се потврдат и проектот биде реализиран, антимонот би можел да стане значаен дел од економската и стратешката соработка меѓу Македонија и Соединетите Американски Држави.
