СДС и Венко Филипче повторно ја свртеа плочата. До пред извесно време уверуваа дека се подготвени за предвремени избори во секој момент, а сега, кога предвремените избори стануваат реална можност, почнуваат да бегаат од соочување со граѓаните.
Наместо јасно да кажат дали се подготвени народот да им пресуди, тие ја префрлаат темата на земјоделието. Но токму земјоделието и сточарството беа оставени на колена за време на нивното владеење. Задоцнети субвенции, долгови, запоставени земјоделци и сточари – тоа е реалното наследство што го оставија СДС и нивните кадри.
Секако дека на земјоделците и сточарите им се потребни поголема поддршка, редовни субвенции и сериозна државна стратегија. Тоа е неопходно ако сакаме домашното производство да опстане и ако сакаме маркетите и месарниците да не се полнат со увезени прехранбени производи со сомнителен квалитет.
Со добра и долгорочна политика во земјоделството и сточарството, Македонија има капацитет не само целосно да ги задоволи домашните потреби од храна, туку и да стане значаен извозник на квалитетни земјоделски и прехранбени производи.
Македонските природни ресурси, плодната почва, поволната клима и долгата традиција во земјоделското производство претставуваат огромна предност која со години не беше доволно искористена. Со навремена поддршка за земјоделците и сточарите, модернизација на производството и поттикнување на органското земјоделство, Македонија може да создава производи со висока додадена вредност и препознатлив квалитет.
Особено поразително е што денес за земјоделството зборуваат истите оние кои зад себе оставија неисплатени субвенции, долгови и разочарани земјоделци. Наспроти таквата политика, со ВМРО-ДПМНЕ обврските кон земјоделците редовно се сервисираат, а статистичките показатели веќе покажуваат раст на производството во повеќе земјоделски гранки, што претставува најдобра потврда дека земјоделството повторно се враќа на вистинскиот пат.
Наместо да зависиме од увоз на храна, Македонија може да стане земја која произведува доволно за сопствените потреби и извезува квалитетни производи, создавајќи нови приходи за земјоделците, отворајќи нови работни места и придонесувајќи за развој на целокупната економија.
Но лицемерно е токму СДС да зборува за земјоделците, кога во нивно време парите не стигнуваа до оние што ја хранат државата. Денес, кога се отвора прашањето за избори, одеднаш се сетија на земјоделието.
Вистината е едноставна: СДС и Филипче се плашат од предвремени избори. Затоа бегаат од темата, затоа измислуваат изговори и затоа се обидуваат да го свртат вниманието од стравот од народната казна.
