СДС се однесува како ученик на последната клупа кој прво ѕирка во тестот на соседот, а потоа убедува дека неговите одговори се подобри од оригиналот.
Штом Владата предводена од ВМРО-ДПМНЕ ќе претстави нова мерка или стратегија, од Бихаќка веднаш се појавуваат со „подобра“, „поголема“ и „помодерна“ верзија на истата идеја.
Додека Владата предводена од ВМРО-ДПМНЕ спроведува конкретни мерки за зајакнување на економијата, отворање нови работни места и намалување на невработеноста, СДС повторно се обидува да ја придобие довербата на младите со пораки кои потсетуваат на нивните добро познати предизборни кампањи.
Оперативниот план за вработување за 2026 година е еден од клучните инструменти преку кои се обезбедува поддршка за младите, невработените и претприемачите. За неговата реализација се обезбедени речиси 40 милиони евра, а мерките и програмите ќе опфатат повеќе од 10.000 лица. Планот предвидува поддршка за самовработување, отворање нови бизниси, практикантство, обуки, преквалификации и создавање нови работни места.
Посебен акцент е ставен на младите, кои добиваат реална можност полесно да се вклучат на пазарот на трудот и да ја градат својата иднина во Македонија. Наместо празни ветувања, се спроведуваат конкретни политики и програми што носат резултати и отвораат нови перспективи.
Во меѓувреме, СДС повторно откри дека младите постојат.
По седум години на власт, денес се претставуваат како нивни најголеми заштитници. Но останува прашањето: ако навистина знаеле како да ги задржат младите во Македонија, зошто тоа не го направиле додека управуваа со државата?
Токму во периодот на нивното седумгодишно владеење, десетици илјади млади луѓе ја напуштија државата во потрага по подобри можности.
Денес СДС ветува по 30.000 евра за отворање бизнис. Утре можеби ќе ветува и по 50.000 евра. Ако продолжи ваквото темпо, наскоро ќе ветуваат и по 100.000 евра. Но младите одамна научија да ја препознаваат разликата меѓу реални политики и политички маркетинг. Ним не им се потребни нови бајки, туку сигурни работни места, можности за напредок и перспектива во сопствената држава.
Затоа Владата продолжува со политики кои создаваат услови за економски раст, нови инвестиции и поголема вработеност. А младите сами ќе проценат кој нуди резултати, а кој повторно нуди само ветувања што добро ги паметат од времето кога СДС беше на власт.
