Портпаролот на ВМРО-ДПМНЕ, Валентин Манасиевски, денеска на прес-конференција упати остри критики кон лидерот на СДС, Венко Филипче, обвинувајќи го за соработка со бугарски структури и организации кои, според него, работат против македонските национални интереси.
Манасиевски истакна дека, како што рече, веќе со недели ВМРО-ДПМНЕ предупредува за, како што ја нарече, соработка меѓу СДС и бугарските власти, со цел внесување на Бугарите во Уставот, што според него би било само почеток на нови барања поврзани со македонскиот идентитет, јазик, култура и историја.
Во своето обраќање тој се осврна и на Рубин Земон, кој, како што наведе, поднел оставка од функцијата во Извршниот одбор на СДС, посочувајќи фотографија на која Земон е заедно со Виктор Стојанов од бугарската Фондација „Македонија“.
Според Манасиевски, фондацијата е позната по ставови со кои се оспорува македонскиот национален идентитет и историја, како и по тврдења дека Македонците и Бугарите се еден народ во две држави.
„Оваа коалиција на Венко Филипче и Рубин Земон, односно на СДС со бугарски организации, е спремна да го негира македонскиот идентитет, да го оспори нашиот македонски јазик, да ја избрише македонската историја и да ја уништи македонската култура“, изјави Манасиевски.
Тој додаде дека, според информации добиени од „свиркачи“, дел од членството на СДС сметало дека ситуацијата отишла предалеку, по што му било сугерирано на Филипче да го отстрани Земон од Извршниот одбор за да не ѝ штети на партијата.
Манасиевски порача дека ВМРО-ДПМНЕ, заедно со граѓаните, нема да дозволи, како што рече, ново предавство на македонските национални интереси.
„Доста е со понижувања, потклекнувања и потчинувања. Време е Македонија да биде горда, исправена и достоинствена“, истакна Манасиевски.
