Лидерот на СДС, Венко Филипче, со секоја своја јавна изјава, според ВМРО-ДПМНЕ, покажува дека за него и неговата партија не постојат црвени линии кога станува збор за националните интереси и државните позиции.
Од партијата обвинуваат дека во изминатиот период Филипче континуирано се обидувал да се доближи до официјална Софија преку изјави кои, како што велат, се спротивни на македонските национални позиции поврзани со идентитетските прашања.
„Веднаш по формирањето на новата бугарска влада, Филипче беше меѓу првите кои јавно честитаа, при што во објава на социјалните мрежи оцени дека Македонија создавала вештачки конфликти со соседите“, посочуваат од ВМРО-ДПМНЕ.
Според партијата, Филипче во телевизиски настапи продолжува да ја промовира тезата дека уставните измени треба веднаш да се прифатат, без притоа Македонија да добие гаранции дека тоа ќе биде последната пречка на евроинтегративниот пат.
Од ВМРО-ДПМНЕ оценуваат дека Преспански договор, Договорот со Бугарија и т.н. Француски предлог се симбол на политиките на СДС, за кои велат дека отвориле простор Македонија да стане предмет на уцени, блокади и билатерални спорови.
„По Зоран Заев и Димитар Ковачевски, Филипче е третиот функционер од СДС кој е подготвен на нови национални отстапки, бидејќи единствената константа во партијата е борбата за власт“, се наведува во реакцијата.
Во соопштението се посочува и дека СДС, додека јавно се претставува како проевропска партија, паралелно се обидува да ги контролира критиките на социјалните мрежи и да создаде впечаток за конзистентен политички наратив.
Од ВМРО-ДПМНЕ дополнително наведуваат и примери за, како што тврдат, контроверзни релации на поранешната власт со личности и бизнис структури поврзани со руски и белоруски интереси.
„Филипче се однесува како веќе да седнал во премиерската фотелја, а не како лидер на опозиција која секојдневно губи поддршка. Политиките на релативизирање на македонскиот идентитет и националните позиции се една од причините поради кои СДС се соочува со пад на довербата кај граѓаните“, велат од ВМРО-ДПМНЕ.