Агенцијата за храна и ветеринарство донесе времена забрана за употреба на водата за пиење од гостиварскиот водоводен систем, поради основано сомневање дека таа е загадена и небезбедна за употреба.
Одлуката била донесена по вонреден инспекциски надзор во пречистителната станица во селото Вруток, спроведен по известување од Основното јавно обвинителство во Гостивар, поплаки од граѓани и пријава од Министерството за внатрешни работи.
Во надзорот учествувале инспектори од Агенцијата за храна и ветеринарство, претставници на Министерството за животна средина и просторно планирање, Јавното обвинителство, Министерството за внатрешни работи и Институтот за јавно здравје.
При контролата било утврдено дека на главниот цевковод од водоводната мрежа нелегално била поставена пумпа, преку која вода од реката Вардар директно се вбризгувала во системот за водоснабдување.
Од водата биле земени мостри, кои се доставени на лабораториско испитување за да се утврди дали е безбедна за пиење.
До добивањето на резултатите од анализите, водата од гостиварскиот водовод не треба да се употребува за пиење.
Од Агенцијата за храна и ветеринарство соопштија дека времената забрана е воведена заради заштита на здравјето на граѓаните, а јавноста ќе биде навремено информирана за резултатите од лабораториските анализи и за понатамошните мерки.
