На својот пат кон Бигорскиот манастир и Крушево, коњаниците од Коњаницата „Св. Јован Бигорски – Патот на Црешовото Топче“ денес пристигнаа во Тумчевиште, каде што беа свечено пречекани од жителите и бројните гости кои ја одбележуваа селската црковна слава – Собор на Свети Архангел Гаврил, во народот познат и како Летен Арангел.
Во чест на празникот и на домаќините, коњаниците, со развеани македонски знамиња и силни патриотски емоции, го изиграа Комитското оро. Во ритамот на музиката, Тумчевиште уште еднаш ја потврди својата длабока приврзаност кон верата, традицијата и македонското историско наследство.
Секој чекор од орото беше израз на почит кон илинденците, комитите и сите македонски херои кои своите животи ги вградија во борбата за слободна Македонија. Комитското оро не беше само дел од празничната атмосфера, туку силна порака дека заветот на предците продолжува да живее и да се пренесува од поколение на поколение.
Средбата на коњаниците со жителите и гостите на селската црковна слава создаде посебен и незаборавен миг во кој се споија духовноста, традицијата, патриотизмот и илинденскиот дух.
По свечениот пречек во Тумчевиште, коњаниците го продолжија патот кон Гостивар, каде што следуваше еден од најзначајните духовни моменти на денот.
Во црквата „Света Богородица“, свештениците упатија молитви за здравје, сила и безбедно патување, а коњаниците го примија црковниот благослов за продолжување на маршот кон Бигорскиот манастир и Крушево.
Благословот беше примен со длабока почит и со свест дека нивниот пат не претставува само физички напор, туку и духовен завет пред Бога, пред татковината и пред жртвата на предците.
Со молитва во срцето и со македонското знаме во рацете, коњаниците го продолжија историскиот „Пат на Црешовото Топче“, уверени дека Божјата закрила ќе ги придружува низ македонските села, планини и предели, сè до Мечкин Камен.
Нивното патување не е само коњички марш низ Македонија. Тоа е пат на споменот, благодарноста и верноста кон сите што се бореле и се жртвувале за слободата на татковината.
Годинешниот коњички марш е посветен на македонското единство и претставува искрен повик до политичките партии, институциите и до целиот македонски народ да се обединат околу она што е најсвето и што им припаѓа на сите поколенија – Македонија.
Илинденците и асномците ги обединувала една голема идеја – слободна, достоинствена и самостојна Македонија. Тој аманет ни го оставиле нам, а наша света должност е да го зачуваме и да им го предадеме на идните поколенија.
Додека одекнуваат копитата на коњите, се развеваат македонските знамиња и се игра Комитското оро, живее и духот на Илинден – вечен потсетник дека љубовта кон татковината никогаш не згаснува.
Утре коњаниците продолжуваат од Бигорскиот манастир кон Крушево
Утре, на 27 јули 2026 година, коњаниците ќе учествуваат на Света литургија во Бигорскиот манастир, по што ќе го примат благословот за продолжување на коњичкиот марш кон Крушево.
Во манастирот ќе биде положена и традиционалната свечена заклетва, со која коњаниците уште еднаш ќе ја потврдат својата верност кон Македонија и кон илинденскиот аманет.
Предвидена програма
10:00 часот – Бигорски манастир
Света литургија, благослов и свечена заклетва на коњаниците.
11:00 часот
По примениот благослов, коњаницата тргнува од Бигорскиот манастир кон селото Јанче.
12:00 часот – Јанче
Пристигнување во селото Јанче, по што коњаницата го продолжува патот кон Галичник.
13:30 часот – Галичник
Пристигнување на коњаницата во Галичник.
15:30 часот
Коњаницата тргнува од Селска Ливада во Галичник кон бачилото Салтаница.
20:00 часот – Салтаница
Пристигнување на коњаницата во бачилото Салтаница.
