СДСМ, Венко Филипче и луѓето околу него, според ВМРО-ДПМНЕ, за власт, моќ и амнестија за криминалите се подготвени на нови национални отстапки и предавства.
Од владејачката партија обвинуваат дека СДС уште од првиот ден доколку би дошол на власт би прифатил уставни измени со кои Бугарите би биле внесени во македонскиот Устав, иако, како што велат, тоа не е последното барање што доаѓа од официјална Софија.
„Следни на маса за отстапки ќе бидат македонскиот јазик, култура, историја и идентитет. На бугарските ултиматуми и диктати нема да им се гледа крајот“, наведуваат од ВМРО-ДПМНЕ.
Во соопштението се посочува дека Венко Филипче, според нив, свесно ја промовира тезата дека внесувањето на Бугарите во Уставот е единствениот услов за продолжување на европскиот пат на Македонија.
Од партијата обвинуваат дека Филипче се претворил во „главен лобист за прифаќање на бугарските диктати“, потсетувајќи на говор на бугарскиот претседател Rumen Radev од 2019 година, одржан на конференција во Русија, на која присуствувал и рускиот претседател Vladimir Putin.
Според ВМРО-ДПМНЕ, Радев тогаш зборувал за македонската историја во бугарски контекст, тврдејќи дека Гоце Делчев бил Бугарин, а словенската писменост дошла од Бугарија.
„Во тоа време владата ја предводеше Зоран Заев, а Венко Филипче беше министер. Немаше никаква осуда за ваквите ставови, како што немаше реакција ниту за изјавите со кои Македонците беа нарекувани ‘северномакедонци’“, стои во реакцијата.
Од ВМРО-ДПМНЕ велат дека бугарските власти немаат намера да застанат само на прашањето за Бугарите во Уставот, туку дека нивна цел е „редефинирање на македонската историја, јазик, култура и идентитет“.
Во продолжение на соопштението се наведува дека доколку СДС повторно дојде на власт, би се дозволило македонските револуционери Јане Сандански, Питу Гули и Даме Груев да бидат претставувани како дел од бугарската историја, а светите браќа Кирил и Методија како бугарски просветители.
Од партијата ги спомнуваат и поранешниот претседател Стево Пендаровски и Рубин Земон, тврдејќи дека нивните ставови се совпаѓаат со бугарските позиции околу македонската историја.
„Времето на предавствата, националните и идентитетските отстапки заврши. ВМРО-ДПМНЕ заедно со граѓаните нема да дозволи нови ултиматуми и уцени на штета на македонските национални обележја“, се наведува во соопштението.