„за македонските работи“ со љупчо цветановски
Митрополитот преспанско-пелагониски г. Петар отворено проговори за случувањата при средбата во Цариградската патријаршија, посочувајќи дека македонските црковни претставници со години трпеле понижувања и неправди, но останале доследни во барањето за канонско признавање на Македонската православна црква.
Во емисијата „За македонските работи“ со новинарот Љупчо Цветановски на ТВ Алфа, владиката Петар раскажа што им порачал на претставниците на Цариградската патријаршија.
Според неговото сведоштво, на средбата неочекувано се појавиле и Партениј и негов придружник, чии ставови владиката ги оценил како спротивни на македонските црковни и национални интереси.
„Јас им кажав дека овие двајцата се натрапници. Потоа им кажав дека, меѓу другото, вие треба да знаете дека ние сме понижувани, ние сме обесправувани, па и обесчестувани, ако може поконкретно да речам, дури и тепани од вас. Но, ние сето тоа сме го поднесувале од вас и од другите цркви, кога сме биле понижувани и така натаму, и никогаш не сме дозволиле како црква да се здружиме со вашите непријатели, односно со тие цркви кои така се однесувале кон вас, туку сме биле доследни и сме барале канонски да дојде нашето признавање како автокефална црква“, раскажа владиката Петар.
Потоа, како што вели, на домаќините им се обратил со една едноставна, но силна порака:
„Вие, да речеме, и нè тепате, и не е трагедијата во тоа што го поднесуваме и тепањето, ама не ни давате да плачеме! Дозволете ни, барем, да плачеме.“
Владиката Петар објаснил и што подразбира под тоа „плачење“:
„Моето ‘плачење’ е да речам дека јас сум Македонец, мојата земја се вика Македонија, мојата црква се вика Македонска православна црква, мојата нација е македонска нација. Е, тоа е нашето ‘плачење’.“
Според владиката Петар, претставниците на Цариградската патријаршија немале одговор на овие зборови.
„Немаа на тоа одговор, се најдоа во небрано и во тој момент не знаеја како да изреагираат, затоа што тоа е вистината, а вистината не треба никого да го навредува“, истакна митрополитот преспанско-пелагониски г. Петар во емисијата „За македонските работи“ со Љупчо Цветановски.
Неговото сведоштво повторно го отвора прашањето за положбата на Македонската православна црква и за правото нејзиното име и идентитет да бидат неразделно поврзани со Македонија и македонскиот народ.
Извор: „За македонските работи“, ТВ Алфа – Љупчо Цветановски
