Мане Јаковлески
Од историскиот 17 јуни 1990 година до денес, ВМРО-ДПМНЕ останува симбол на надежта, државноста и борбата за Македонија.
Постојат денови што не припаѓаат само на календарот. Денови што стануваат дел од судбината на еден народ. Денови што остануваат запишани во колективната меморија како пресвртници меѓу минатото и иднината. За многу Македонци, 17 јуни 1990 година е токму таков ден.
Во време кога Македонија сѐ уште не беше независна држава, кога по децении едноумие и политички стеги народот копнееше по слобода, достоинство и национално будење, повторно се роди идејата што ги обедини Македонците околу едно име кое никогаш не исчезна од нивните срца – ВМРО.
На 17 јуни 1990 година, во Домот на млади во Скопје, беше формирана ВМРО-ДПМНЕ.
Но вистината е дека ВМРО-ДПМНЕ не започна тогаш, ВМРО живееше многу пред тоа.
Живееше во илинденските камбани и во револуционерните заклетви. Во сонот на Гоце Делчев за Македонија како поле за културен натпревар меѓу народите. Во храброста на Даме Груев, Никола Карев, Питу Гули, Тодор Александров, Методија Андонов-Ченто,… Во делото на илинденците и асномците. Во жртвата на илјадници познати и непознати борци, во солзите на прогонетите, во маките на затворениците и во надежта на македонските иселеници расфрлани низ светот.
Затоа, кога повторно се слушнаа четирите свети букви – ВМРО – тоа не беше создавање на нешто ново. Тоа беше враќање на една историска идеја кај својот народ.
ВМРО никогаш не било само организација.
ВМРО е чувство што не може да се избрише.
ВМРО е аманет што се пренесува од генерација на генерација.
ВМРО е љубов кон Македонија која не се мери со титули, функции или политички позиции.
Во темелите на современата ВМРО-ДПМНЕ стои ВМРО и ДООМ-Движењето за ослободување и обединување на Македонија.
Македонската политичка емиграција во Европа, Австралија, Америка и Канада ја одржуваше живата искра на македонската национална идеја во времиња кога за многу национални теми не смееше ниту да се зборува.
Берлинските и минхенските средби, македонските клубови, црковните општини и иселеничките организации, безбројните протести, разговори, состаноци и иницијативи на патриотите ширум светот ја создаваа почвата од која подоцна израсна ВМРО-ДПМНЕ.
Во изминатите 36 години ВМРО-ДПМНЕ помина низ победи и порази, низ искушенија и предизвици, низ периоди на власт и опозиција. Но едно нешто остана непроменето-вербата дека Македонија мора да биде над сѐ.
Затоа многумина велат дека на Македонија ѝ е судена ВМРО.
Не како привилегија, туку како обврска. Како историска одговорност. Како должност кон сите генерации што сонуваа за слободна, достоинствена и просперитетна Македонија.
Денес, триесет и шест години подоцна, ВМРО-ДПМНЕ повторно ја предводи Владата на Македонија. Во време исполнето со нови предизвици, организацијата ја носи истата мисија што ја имаше и во 1990 година-да биде чувар на државните и националните интереси и двигател на развојот на Македонија.
На чело на таа генерациска мисија денес се наоѓа Христијан Мицкоски, претседател на ВМРО-ДПМНЕ и претседател на Владата на Македонија. Продолжувајќи ја традицијата, тој ја води државата со визија за економски силна Македонија, модерна европска држава со зачуван идентитет, достоинство и самодоверба.
Најголемата сила на ВМРО-ДПМНЕ отсекогаш биле и остануваат луѓето – ветераните, верните чувари на организацијата и нејзините идеали, кои останаа исправени и тогаш кога беше најтешко; младите, кои ја преземаат одговорноста за иднината; жените, кои со својата посветеност ја градеа организацијата; членовите и симпатизерите, кои никогаш не ја изгубија вербата.
Затоа 17 јуни не е само годишнина. Тоа е ден на благодарност кон сите што ја создаваа организацијата. Ден на почит кон сите што се жртвуваа за Македонија. Ден на сеќавање на оние што повеќе не се меѓу нас, а ги вградија своите животи во оваа идеја.
17 јуни е ден на надеж за генерациите што доаѓаат.
Зашто Македонија не завршува на своите граници. Таа живее во секој Македонец, каде и да е. Во Европа, Австралија, Америка и Канада. Во Пиринска и Егејска Македонија. Во Мала Преспа и Гора. Во секое иселеничко огниште. Во секое македонско семејство. Во секое срце што чука за татковината.
Зашто ВМРО е дел од македонската историја.
ВМРО е дел од македонската борба.
ВМРО е дел од македонската државност.
ВМРО е дел од македонската надеж.
ВМРО е дел од македонската иднина.
ВМРО е Организација.
ВМРО-ДПМНЕ го продолжува аманетот на ВМРО.
На 17 јуни 2026 година, со почеток во 19:00 часот во Струмица, ќе биде одбележан значајниот јубилеј – 36 години од формирањето на ВМРО-ДПМНЕ.
Настанот ќе биде можност за заедничко оддавање почит на сите генерации кои низ изминатите триесет и шест години со својата работа, пожртвуваност, посветеност и верба придонесуваа за развојот и јакнењето на партијата.
Во духот на заедништвото и традицијата ќе биде испратена порака на единство, достоинство и верност кон идеалите врз кои е создадена ВМРО-ДПМНЕ и кои продолжуваат да бидат нејзина трајна определба.
Струмица ќе биде местото каде што ќе се потсетиме на изминатиот пат, но и ќе ја потврдиме заедничката определба за иднината и за зачувување на вредностите врз кои е изградена ВМРО-ДПМНЕ.
Нека е честит 36-тиот роденден на ВМРО-ДПМНЕ!
Да живее Организацијата!
Да живее Македонија!