ДЕЛ ОД ПУБЛИКАЦИЈАТА „МАКЕДОНЦИТЕ ВО СВЕТОТ“ (ТРЕТ ДЕЛ) НА СЛАВЕ КАТИН
9. “Македонска нација” (1971-1990) – Минхен. Гласилото “Македонска нација” е регистрирано како независно списание за општествени прашања и култура, како двомесечник и се печати во Минхен. Првиот број е отпечатен на 30 јануари 1971 година (како двомесечник за јануари – февруари), во почетните броеви како независно гласило, а потоа како орган на Движењето за ослободување на Македонија (ДОМ) и на Народноослободителниот фронт на Македонија (НОФМ). Се печатеше на македонски јазик на триесетина страници, на формат како списание на 21 х 29 см. Главата на списанието е на македонски јазик, меѓутоа се менува бојата на секое клише.
Бројот 92 од 1990 година на “Македонска нација” се јавува како орган на НОФМ и е последен.
Весникот „Македонска нација“ стана чувар на македонските традиции, јаик и култура, чувар на македонскиот идентитет. Тој беше извор на вистината за македонската трагедија но и сведок на македонскиот непокор. Затоа „Македонска нација“ со нетрпение беше очекуван и со радост беше читан, препрочитуван и раскажуван меѓу македонската емиграција распослана на сите страни на светот.
Целите на гласилото „Македонска нација“, покрај другото, беа да ги заштити националните интереси на целокупниот македонски народ; да води борба за извојување национални права и слободи за Македонците под власта на Грција и Бугарија; да подготвува терен за обединување на трите дела од распарчена Македонија во единствена македонска национална целина; да работи за побогат духовен, културен и политички живот на Македонците во туѓина и да ја шири во надворешниот свет вистината за Македонија и македонскиот народ, притоа, разобличувајќи ги лагите и клеветите што ги шират балканските националисти и империјалисти.
Притоа, името на гласилото јасно го оцртувало неговиот општ македонски национален карактер, односно дека тоа не беше орган на политичка партија, друштво или организација, туку беше широка национална трибина во која можеше да соработува секој Македонец кој сакаше да работи за доброто и среќата на својата нација.
Издавачите на „Македонска нација“сметаа дека на македонската национална кауза може да и служи секој чесен Македонец без разлика на неговите филозофски погледи, идеолошки убедувања или партиска припадност. Гласилото немало цел да биде ни антикомунистичко, ни комунистичко, туку натпартиско, една широка македонска национална трибина, што работеше на постигнување македонско единство.
10. “Македонска трагедија” (1973-1975) – Минхен. “Македонска трагедија” се печатеше на македонски јазик на ист формат како и списанието “Македонска нација” (21 х 29 см.). Во првиот број, а во продолжение и на вториот е текстот под наслов: “Повик на револуционерниот орган “Македонска трагедија” за организирано обединето движење на масакрираното тело на македонскиот народ на трите дела: приморскиот (егејскиот), вардарскиот и пиринскиот дел”.
“Македонска трагедија” се појави како прилог на посебниот број “Обединета Македонија”, во Минхен од октомври – декември 1975 година како број 11, година ИИ. Тој е последен број на гласилото под ова име.
11. “Обединета Македонија” (1975) – Минхен. Во Минхен, Германија 1975 година се појави весникот ‘Обединета Македонија” како тримесечно издание (за октомври – ноември – декември). Тој е отпечатен на 14 страници на формат 31 х 47 см. на македонски, а има текстови и на англиски јазик. Издавач на весникот е Движењето за ослободување и обединување на Македонија (ДООМ).
12. “Наш лист” (1978) – Гетеборг. Списанието “Наш лист”, всушност е првото име што го носат броевите од 1 до 9, а од бројот 10 до денес се печати под новото име “Македонски весник”. Првиот број излезе на 12 февруари 1978 година на 12 страници, на формат 21 х 29 см. на македонски јазик со кирилица. Тоа е информативен лист на друштвото на Македонците “Гоце Делчев” од Гетеборг. Клишето на главата е на македонски и на шведски јазик, лево е амблемот на друштвото, а во средината ликот на Гоце Делчев.
13. “Македонски весник” (1979 – ) – Гетеборг. Списанието “Македонски весник” започна да излегува на 12 февруари 1978 година, како информативен весник и периодична публикација на македонското друштво “Гоце Делчев” од Гетеборг под име “Наш лист”, а од двобројот 6 и 7 (септември и октомври) 1978 година, како орган на Интересната заедница на македонските друштва и клубови во Шведска. Првата година под името “Наш лист” се отпечатени 9 броеви, а од бројот 10 печатен во јануари 1979 година, списанието го менува името во “Македонски весник”. По Второто годишно собрание на Македонската интересна заедница во Шведска, од февруари 1981 година списанието започна да излегува како орган на Координациониот одбор на македонските друштва и клубови во Шведска.
Првите броеви на списанието “Македонски весник” се печатени на 12 страници со скромни новинарски и технички можности. Меѓутоа, од број до број списанието се подобруваше и по обем и по содржина, израснувајќи денес во модерно и современо гласило, паралелно растејќи како што се развиваа друштвата и клубовите на нашите привремено вработени во Шведска.
Уште на самиот почеток списанието беше замислено како периодична публикација кое ќе излегува според потребите и можностите, а со цел членовите на друштвата и клубовите заемно да се информираат за работата на секциите, фолклорните групи и фудбалските екипи. Настојувањата беа да информираат и за актуелните прашања во Македонија и пошироко, а во тие рамки и за прашањата сврзани со правата и обврските на Македонците во Шведска.
Во исто време, а за поцелосно активирање на најмладата генерација на македонските граѓани во Шведска, почнувајќи од 1979 година, како додаток на „Макодонски весник“ се печати и списанието за деца „Снегулка”.
Прололжува
Пишува: СЛАВЕ КАТИН
