ДЕЛ ОД ПУБЛИКАЦИЈАТА „МАКЕДОНЦИТЕ ВО СВЕТОТ“ (ТРЕТ ДЕЛ) НА СЛАВЕ КАТИН
Етничките организации во новите средини на Македонците во Канада ги зачувуваат своите национални вредности, а во исто време го збогатуваат мозаикот на мултинационалните култури во новите средини во иселеништвото
МАКЕДОНСКО-КАНАДСКИОТ КОМИТЕТ ЗА ЧОВЕЧКИ ПРАВА бил формиран на 8 август 1986 година. На тој ден се одржал официјален состанок на групата активисти за човекови права, кои развиле широка активност на меѓународен план. Така, една од првите задачи на Комитетот била да се запознае јавноста со неговите цели и задачи; со барањето на Комитетот за почитување на човечките права на Македонците во Егејска Македонија, а во прв ред, за признавање на македонското национално малцинство во Грција.
Македонскиот комитет за човековите права дејствува надвор од границите на Македонија, со што македонското прашање добило светски размери, а посебно прашањето за заштитата на правата на малцинствата во Грција, Бугарија и Албанија.
МАКЕДОНСКИ СТУДЕНТСКИ ОРГАНИЗАЦИИ. Првата македонска студентска организација била формирана во Торонто во 1987 година, на истоимениот универзитет. Се проценува дека на универзитетот “Торонто” студираат околу 250-300 студенти од втората и третата генерација на македонското иселеништво. Посебна улога во организирањето и работата на македонската студентска организација одиграла Катедрата по македонски јазик.
Македонската студентска организација при универзитетот “Торонто” одржувала тесна соработка со повеќе етнички студентски организации.
Втората македонска студентска организација била основана во рамките на универзитетот “Јорк” во Торонто. Овој универзитет е познат како етнички универзитет, бидејќи во него студираат студенти од повеќе етнички групи.
Третата по ред македонска студентска организација постои во рамките на Политехничкиот институт во Торонто. Во тек на формирање се и други македонски студентски организации на универзитетот во Скарборо и во Кингстон.
Исто така, во Торонто постојат и други македонски младински организации во чии редови била вклучена школската младина од средните училишта и младинската организација на вработените млади Македонци. Средношколската младинска организација била основана во 1992 година.
Во Торонто постои и организацијата “Децата на Александар Македонски”, која во своите редови, главно, ги собира новодојдените млади луѓе од Македонија.
МАКЕДОНСКО-КАНАДСКОТО МЕДИЦИНСКО ДРУШТВО било основано во 1990 година, во главниот град на Канада, Отава. Група лекари ја иницирале потребата од организиран настап на лекари од македонско потекло, кои живеат во Канада и во САД. Тие во исто време организирано дејствуваат во зачувувањето и зацврстувањето на македонските корени, како и во одржувањето на тесни врски со Македонија.
Во почетокот друштвото се викало “Македонско-канадско лекарско друштво”, а во 1992 година го променило името во “Македонско-канадско друштво за медицински стручњаци”.
КАНАДСКО-МАКЕДОНСКАТА ФЕДЕРАЦИЈА била основана во август 1990 година во Торонто. Иницијаторите за создавање на федерацијата со писма и покани им се обратиле на сите македонски друштва и организации да учествуваат на заедничкиот состанок, на кој се донела одлука за основање на федерацијата. На состанокот бил донесен статут на федерацијата, кој претходно бил прифатен од канадските власти и изработен во согласност со законите на Канада.
Канадско-македонската федерација покажала активност, во прв ред, во помагањето на македонското лоби во борбата за признавање на Република Македонија од Обединетите нации и од други меѓународни институции, како и во пружање материјална помош. Федерацијата го организирала “Македонско оро”, на кое биле присутни голем број македонски доселеници и претставници на канадските власти. За време на оваа културна манифестација биле собрани големи финансиски средства за помош на Македонија, кои, главно, биле наменети за купување лекови.
МАКЕДОНСКА КАТЕДРА. Основите на македонската катедра по македонски јазик во Торонто биле поставени на Третата славистичка конференција во 1997 година. Таа била оранизирана со голема поддршка на универзитетски професори и студенти од Канада и САД, како и од Македонци обединети околу црквата Св. Климен Охридски и литературното друштво “Браќа Миладиновци”. Денес Македонската катедра е една од најзначајните на северноамериканскиот континент.
КАНАДСКОТО-МАКЕДОНСКОТО ИСТОРИСКО ДРУШТВО било основано во 1991 година како непрофитна организација, а неговата главна цел била објективно да се регистрира и обработи историјата на македонското иселеништво во Канада.
Членовите на ова друштво се лица од најразлични професии и возраст, на кои историјата на иселеништвото и Македонија им претставува преокупација. Мисијата на друштвото е да ги проучува достигнувањата на канадските Македонци во времето и просторот, како и да го документира развојот и чувањето на националните традиции, културата, религијата, јазикот и историските моменти од почетокот до денес.
Исто така, една од задачите на друштвото е да ја запознае канадската научна јавност со потеклото на Македонците и со нивниот придонес во развојот на Канада и на нејзиното општество. Тоа работи во просториите на Канадско-македонското место, каде има библиотека со соодветна опрема. Друштвото било организатор на разни предавања од областа на македонската историја, јазикот и културата.
МАКЕДОНСКО-КАНАДСКА ДЕЛОВНА И ПРОФЕСИОНАЛНА АСОЦИЈАЦИЈА. Таа била основана во 1992 година во Торонто. Иницијаторите за формирање на оваа деловна асоцијација биле бизнисмени, кои во септември 1992 година одржала основачко собрание, на кое била избрана и нејзината управа.
Целта на Македонско-канадската деловна и професионална асоцијација била да ги собере и меѓу себе да ги зближи бизнисмените од македонско потекло во Канада; да им се помогне на помалите бизнисмени во издигнувањето и проширувањето на нивната дејност; да ги помага македонските средства за јавно информирање и др.
Посебно место во програмата на Македонско-канадската деловна асоцијација заземала помошта за Република Македонија, потоа зацврстувањето на контактите со македонските бизнисмени во Македонија.
Прололжува
Пишува: СЛАВЕ КАТИН
