Македонска Нација
Членската книшка е печатена во Бугарија, а оригиналниот текст е на бугарски јазик и со тогашниот бугарски правопис, бидејќи женската организација била формирана и дејствувала во Бугарија.
Македонскиот женски сојуз бил организација на жени бегалци од Македонија, формирана во Бугарија. Дејствувал во периодот од 1926 до 1934 година и одржувал контакти со ВМРО.
Во почетокот членството на Македонскиот женски сојуз го сочинувале главно помалку познати Македонки од бегалските и емигрантските средини. Подоцна во организацијата се вклучуваат и сестрите на Тодор Александров, Драганов и други жени од круговите на познати дејци, а во нејзините активности свое место добива и Мара Бунева.
Судбината на Македонскиот женски сојуз е дел од пошироката и сложена историја на македонските емигрантски и револуционерни организации што дејствувале во Бугарија меѓу двете светски војни. Создавани од Македонци поврзани со македонското прашање, тие дејствувале во услови на силни политички влијанија, внатрешни поделби и притисоци.
По Деветнаесетомајскиот преврат во 1934 година, бугарските власти го забраниле Македонскиот женски сојуз, како и голем дел од организациите поврзани со ВМРО.
Но документите остануваат.
Самата членска книшка претставува значајно историско сведоштво. Нејзината содржина зборува за Македонија, за жените Македонки, за борците за слободата на Македонија и за стремежот кон слободна и независна Македонија.
А во неа останале запишани и зборовите:
„Боже, помогни да доживеам Слободна и Независна Македонија!“
Македонски женски сојуз
Членска карта бр. 36
Превод од бугарски на македонски јазик
ВЕРУВАМ
за
сите жени Македонки
- Јас верувам дека божествената правда ќе блесне и на родното небо. Јас верувам дека слободата е крилеста и дека ќе го озари нашиот народ!
- Ги благословувам борците за слободата на Македонија, затоа што тие ги остваруваат светлите народни идеали.
- Ги величам хероите и хероините и смирено се поклонувам пред нивниот пламен, затоа што нивната саможртва е величествена.
- Во душите на своите деца и ближните ја всадувам љубовта кон Македонија.
- Секогаш присуствувам на молебени, манифестации, собранија, излети и посети организирани од Македонскиот женски сојуз, затоа што не сакам со моето отсуство да ја намалам нивната бројност и да ја зголемам радоста на вековните поробители.
- Редовно ја плаќам својата членарина, затоа што знам дека таа е само капка во морето во споредба со неизмерниот данок на оние кои го принесуваат својот живот пред родниот олтар.
- Се сметам за среќна што сум членка на Македонскиот женски сојуз, кој се бори за слободата на Милата Татковина.
- Ги исполнувам повелбите на Сојузот и во светиот ден на Македонија со спокојство ќе кажам: „Родино света, јас не бев бездеен набљудувач на твоите страдања, а иако многу малку дадов за тебе, го дадов од срце и душа!“
- Мојата утринска и вечерна молитва завршува со возгласот: „Боже, помогни да доживее Слободна и Независна Македонија!“
Архивска забелешка
Членската книшка е печатена во Бугарија, а оригиналниот текст е напишан на бугарски јазик, со тогашниот правопис. Во оваа објава текстот е преведен и јазично приспособен на македонски литературен јазик, со настојување да се зачуваат неговата содржина и изворна порака.
Членската книшка останува вредно историско сведоштво за стремежите на овие жени – љубовта кон Македонија и надежта дека еден ден ќе ја доживеат слободна и независна.
