Сквернавењето на црквите и џамиите и говорот на омраза немаат врска со верата и нацијата
Светски Македонски Конгрес
Сквернавањето на верски објекти и навредите на етничка и верска основа немаат врска ниту со верата ниту со нацијата! Духовните светилишта, црквите и џамиите, се богатство на народите и културите во верата кон Бога и грев е нивно сквернавење без никакво оправдување и поради никакви мотиви. Тоа е криминал од најдолен вид спротивно и на Библијата и на Куранот, затоа што и христијанството и исламот се против насилството, омразата и одмаздата, а за мирот и љубовта, разбирањето и почитувањето. Сквернавењето на верски објекти и навредите на етничка и верска основа не заштитуваат ниту промовираат ничии етнички, јазични и културни права.
Светскиот Македонски Конгрес (СМК) апелира до граѓаните да спречат, пријават и се откажат од учество во сквернавење на цркви или џамии на целата територија на Македонија и да се откажат од навреди и провокации на верска и етничка основа на јавни манифестации и во секојдневието.
СМК од Владата на Македонија бара итно расчистување на сите случаи на сквернавење на верски објекти или поттикнување и разгорување расна, ентичка и верска омраза, раздор и нетрпеливост, како и пронаоѓање и најстрого казнување на сторителите. СМК укажува дека не е само обврска на власта да ги санкционира сторителите на кривични дела, обврска е на граѓаните да спречат, пријават и да не учествуваат во нивно вршење!
СМК бара од верските заедници, политичките партии, државните органи и јавните установи, во секое време и на секое место да ги едуцираат граѓаните против сквернавење на верски објекти, против навреди и провокации на етничка и верска основа на јавни манифестации и во секојдневнието и против расната, етничката и верската омраза, раздор и нетрпеливост, затоа што одговорноста е на сите, според надлежностите и овластувањата.
СМК ги повикува младите, учениците, студентите и невработените, како и навивачките групи, да престанат со меѓусебни навреди и провокации на етничка и верска основа, да се воздржат од повреда на туѓи имоти и животи, да се воздржат од тепачки во училишта, на стадиони, на јавни културни и спортски манифестации, да се воздржат од тепачки во автобуси и на јавни места, да се откажат од сите графити со навредливи содржини кон други, во секое време и насекаде, да спречуваат други во таквите намери и да ги заштитат послабите и немоќните.
СМК жали, доколку сквернавењето на верски објекти и поттикнувањето и разгорувањето расна, етничка и верска омраза, раздор и нетрпеливост е од партиски мотивирани лица со цел компромитирање и рекомпонирање на власта, заради стекнување симпатии на граѓаните, а всушност дестабилизирање на државата.
СМК од Владата и надлежните органи бара навремено детектирање на групи и секти кои од позиции на агресивен верски фанатизам сакаат Македонија да се реорганизира во исламска држава со шеријатско право, а кон сите лица кои се стекнале со македонско државјанство со природување, доколку на тие основи прават повреда на Уставот и законите, под итна постапка да им се одземе македонското државјанство и трајно да се протерат од државата Македонија!
Или ќе се заштитиме единствени и обединети како нација и држава, или ќе не разнебитат и растурат сите заедно! Единствени сме затоа што сме различни, а обединети мора да останеме за да ги сочуваме разликите и единството на нацијата и државата. Љубовта кон своите, не прави посилни во почитувањето меѓу себе! Не е грев што некои се побројни а другите помалубројни, сите сме еднакви пред Уставот и законите! Мораме да ја почитуваме културната автономија и стекнатите права на етничките заедници во Македонија независно од пописните резултати како услов за натамошна меѓуетничка доверба, разбирање и толеранција. Мораме да престанеме со омраза и одмазда поради бројки, правата не може да се квантифицираат, нив или ги има или ги нема. А, правата во Македонија на хартија се повеќе од било каде на светот, во рамките на материјалните можности на општеството во целина. Ние сите заедно сме цивилизација на мирот и љубовта, која претставува основа на современиот културен глобализам и на Нова Европа! Но, мора да бидеме свесни дека животот во заедница со други луѓе не подразбира само права, туку создава и обврски, дека мораме да ги почитуваме туѓите имоти и животи и да се воздржиме од злоупотреба на разликите, на верското уверување и етничкото потекло. Се разбира, за овие вредности на толеранција и коегзистенција државата мора постојано да делува едукативно и превентивно, а наградите и санкциите им припаѓаат на сите според заслугите, независно од разликите и бројките.
