Настанот во Скопје ќе ги обедини младите претприемачи, технолошките професионалци, студентите и дијаспората во дискусија за можностите што ги носат новите технологии и глобалната соработка.
Македонците ширум светот сѐ повеќе се истакнуваат како успешни бизнис лидери, научници, истражувачи и иноватори кои создаваат решенија и технологии што го менуваат начинот на кој живееме и работиме. Нивниот придонес во најдинамичните индустрии на денешницата претставува вреден капитал што може да биде двигател на нови можности и за развојот на Македонија.
Токму затоа, на 17 јуни 2026 година во Скопје ќе се одржи настанот „Brains Beyond Borders – Млади, Иновации и Технологија“, кој има за цел да ги поврзе младите таленти, претприемачите, технолошките професионалци и претставниците на македонската дијаспора во заедничка дискусија за иднината на иновациите и вештачката интелигенција.
Настанот ќе се одржи во Среќа Бар во Скопје, во периодот од 11:00 до 14:00 часот, а е организиран во партнерство со Generation M и Стартап Клуб Скопје.
Во фокусот на разговорите ќе бидат можностите што ги носат вештачката интелигенција и новите технологии, улогата на младите во современата економија, како и начините на кои глобалната мрежа на македонски таленти може да придонесе за создавање нови перспективи за идните генерации.
Преку експертски панели, интерактивни дискусии и можности за вмрежување, учесниците ќе имаат можност да разменат идеи, да воспостават нови професионални контакти и да иницираат соработки кои ќе придонесат за развојот на технолошкиот и иновативниот екосистем во Македонија.
„Brains Beyond Borders“ претставува платформа за поврзување на знаењето, искуството и визијата на Македонците од земјата и дијаспората, со заедничка цел – создавање инспирација и нови можности за следната генерација лидери, иноватори и претприемачи.
Организаторите ги покануваат сите заинтересирани млади луѓе, студенти, професионалци и претставници на бизнис заедницата да бидат дел од оваа значајна иницијатива и заедно да придонесат во обликувањето на иднината предводена од знаење, технологија и иновации.
