20 декември 1945 г.

Проглас

Да живее братството и единството на народите

Народи како нашиот, бездомници, со векови потиснувани и поробувани, го грабнале оружјето во рацете и се борат за извојувањето на највисокиот и најблагородниот идеал, за слободата. Затоа што слободата не се подарува, туку се ИЗВОЈУВА.

И народите кои се борат за такви идеали решаваат или да живеат или да умрат.

И нивната борба се признава од целиот свет, зашто се базира врз принципите на самоопределувањето на народите, право кое и самата буржоазија го поткрепува. Грците велат дека ќе водат крвави борби за да ја обезбедат многусаканата слобода во Северен Епир и неговото обединување со мајката Грција, базирајќи се на правата на поробените националности за самоопределување. Тоа го вели грчката буржоазија и потпалува такви движења за материјалната експлоатација на земјата и за обезбедувањето на грчката буржоаска олигархија, зголемувањето на државнокапиталистичките резерви и тоа секогаш на штета на земјата на сиромасите, на измачениот карод.

Но кога таквите борби ги водат антифашисти и кога главната движечка сила е самиот народ, не може а да не се определи судбината на својот иден живот и опстанок.

Така и ние како народ, коишто никогаш не ги забораваме харингите и рицинусот, ќотекот, насилството, стрижењето на косите и интернацијата, се бориме за да го направиме нашиот народ господар на својата земја, базирајќи се секогаш и во секој случај на правото на самоопределувањето на поробените нации.

Младинци и младинки,

Сплотете се сите под знамето на Народноослободителната антифашистичка организација на младината на Македонија и борете се за еден подобар живот, за една поширока иднина, што ќе ги спечалите кога ќе ја извојувате вашата национална слобода, под слободни услови на живеење и во рамките на една народна демократија.

Да живее правото на самоопределувањето на народите! Да живее правото на Народната демократија!

20 декември 1945 година.                            

Окружниот одбор на НОМС на Воденскиот округ

АМ.   -   Збирка   „Егејска   Македонија   во   НОБ 1945-1949", АЕ: 561.