Македонска нација

Генралната проба за насилно рушење на Владата заговарано од опозицијата започна. На првиот ден на протестите пред Владата на Македонија, насилните демонстранти организирани од СДСМ повредија 38 полицајци, од кои шест потешко. На вториот ден на протестите повторно насилство во кое е повредена новинарка и фотограф на една новинска агенција. Меѓу протестантите се појавија и челниците на СДСМ, освен нивниот лидер.

Лидерот на СДСМ, Зоран Заев, по објавувањето на серија креирани прислушкувани материјали кои имаа за цел да го збунат населението и да предизвикаат недоверба кон институциите на системот и челните луѓе на владеачката ВМРО-ДПМНЕ, започна со пробите на сценариото за насилно рушење на демократски избраната власт. Таа би требало да кулминира со главниот митинг на опозицијата, по сценарио слично на српското и украинското.

Долготрајната негативната деструктивна кампања на опозицијата резултираше со насилство врз полицијата, со повредени полицајци, со уништен општествен имот. Демонстрантите предводени од челниците на СДСМ на протестите го симнаа македонското знаме, ја нападна македонската полиција, повредија македонски полицајци, го закрвија македонскиот народ и ја понижија сопствената држава.

Очигледно е дека интелектуалниот кадар на СДСМ нема визија, нема цел, нема проекти кои можат да ја влечат македонската композиција и да го привлечат народот. Исто така, тие не сакаат судска завршница на случајот со прислушкување. Оттука тие ја забрзаа единствената опција, а тоа е дестабилизацијата на земјата, за потоа да дојде до формирање на преодна влада преку која би влегле во власта. Меѓутоа, така не се сака сопствена земја, така само се прави штета на државата. Со ваквите потези СДСМ го достигна дното на политичкото делување.

Пред извесно време тој за локална охридска телевизија ќе изјави дека „пред некои 20 години работел по полето и дека најверојатно Господ го црпна од таму од нивите и го донел овде, за така низ вода да го пушти“. Но, ако тој е пуштен низ вода, кој му дава право низ вода да ја пушти целата држава и македонскиот народ?

Зоран Заев како лидер на најголемата опозиска партија покажува непостојаност и слабост. Наместо да оди со позитивна кампања и помогне во развојот на македонската економија, а со тоа да го привлече народот, тој работи на негативна кампања која и` нанесува огромни повеќекратни штети на земјата.

Со своите постапки, Заев го закрвува народот, ја дестабилизира земјата, а кој е тој бизнисмен кој би сакал да инвестира во кризно подрачје? Кој е тој бизнисмен кој ќе склучи договори со македонски фирми ако знае дека поради кризата може да биде доведено во прашање исполнување на договорените обврски. Нема инвестиции, нема работа, нема вработување, а со тоа следат и откази. Тоа што го прави лидерот на опозицијата Зоран Заев, тоа не е љубов кон македонскиот народ и Македонија.

Од друга страна, според Светска банка, Извештајот на Дуинг бизнис, Македонија е лидер во регионот и Југоисточна Европа во делот на правење бизниси. Во 2015 година се предвидува дека Македонија ќе има раст на БДП за 3,8 проценти, односно 3,9 проценти идната година, прва во Европа според аналитичарите на ЕК. Ваквите очекувања доаѓаат врз основа на бизнис климата која во последните години науморно ја креира владата на премиерот Никола Груевски, кој за цело време води позитивна кампања. Сосема е во право кога премиерот вели дека така се сака сопствената земја.

Во светот Македонија е на триесетото место од вкупно 189 економии, а во Европа сме подобри од 16 земји  членки на ЕУ. Добрите оценки за нашата економија и за условите за водење бизнис во изминатиот период стигнаа од сите меѓународно релевантни институции. Секое уништување на овој макотрпно стекнат имиџ ќе оди на душа на СДСМ.